皇族出巡扮親民

民建聯與商台搭上成為全城熱話，未知節目做乜之前商台強調編輯自主民建聯強調只談民生不談政治，但觀乎今日幾份報紙報導（包括東字頭）均無法避免地反映節目做騷意味濃似廣告雜誌多於一切，而所謂的被訪對象反應欠佳，那，究竟問題出在哪裡？

商業電台是否為錢賣時段我不作討論，他們為了錢放棄了做電台最基本責任－－提供好聽的節目，公眾自有定論，問題是：民記錢多，據稱此次『贊助費』不少於七十萬，邊個諗呢條橋出黎呢？


其實很奇怪的：民建聯一直聲稱自己願意聽市民聲音，接觸市民，但其實他們所接觸的市民都是幾類：１）為飲為食為旅行理得你支持曾蔭權曾志華定係曾志偉；２）你幫到我果陣我咪撐你囉；３）講乜都岩，民建聯最好。所以，他們有否真正願意聽市民聲音，其實大家心中有數，因為他們一直是選擇性接收市民聲音：你要求我改交通燈位置擴闊行人路面等等我實聽到仲幫你手兼出晒鏡領功，你要求最低工資或者全面直選咩？哦？我突然有耳疾添．．．

所以，落區接觸一班民記其實一直無乜接觸的市民，仲要直播，無論先前做幾多事先準備，注定欠佳：就算不被人當面柴台，也不會有他們想要的效果。

另外，他們派的「新星」究竟有幾多人識？現時落得被人當面指出『乜你係呢區議員咩？』『長毛落區同我地傾就見得多，你地有咩？』的囉架來丟的場面，可算是自討苦吃。

所以安排該黨區議員反映該區問題，然後自己友回應『我地會跟進』，這類自吹自擂的公開自瀆場面，放在深夜是比較適合，但真的有人有興趣聽嗎？仲要俾錢播！

更可笑的是口口聲聲要接觸市民，但為怕被反對自己政見的人當面對質，選擇迴避，選擇不公開下次節目行程：哦？咁就叫接觸市民咩下？

又學唔足偉大祖國某類官員：出巡落區之前搵齊幫手做媒，以人多勢眾扮受觀迎掩遮真正市民聲音。其實都唔明：既然駛得呢筆，唔爭在駛多筆搵班人晚晚去唔同區扮受訪啦！

不妨想想深夜聽節目的是什麼人：深宵工作的朋友，包括的士司機，與及還有習慣聽深宵節目的聽眾，多數都係七八十後。他們聽開深宵節目期望得到什麼？我想，就算近年深宵節目質素如何下降，想聽到主持播歌也是最基本要求，你最好少說話多播歌，我日頭已經唔多聽到歌喇；再不是，就是攪笑，理你班友亂講一通，好笑的話也收貨。

要聽政治民生節目，市面上受歡迎的大都是對民記這類『疑似站在市民那邊實質令人懷疑』的禮義廉政黨並不有利，他們會有興趣在深夜聽你們買個時段來粉飾個人形象嗎？

當同一黨的人表示不出席城市論壇，因為那班反對他們的人對他們侮辱，然後被人批評逃避民眾聲音，轉個頭買個時段做表面功夫扮聽市民聲音，結果卻核核突突，民建聯，你咪當香港市民個個為左蛇宴荔枝團免費影證件相就係無知先得架，香港人至叻係乜？「利益照受，票又唔投俾你」，真係同你講心？你講果堆都唔岩聽，咪傻啦！

講到尾，真的不明白那班人為何咁傻，用錢做一些吃力不討好宣傳做唔到兼失禮丟架的事，我相信此節目會個個星期被人以放大鏡檢視，嗯，我們樂於睇人出錢出醜，因為佢地人氣壯，真金白銀出賣香港。