雖然不能夠被稱為SATC忠實fans，而我又的確係六季播完有朋友好好搵齊俾我由頭睇起先開始認識呢幾條女，咁睇完六季加兩套戲又係喜歡，不過喜歡歸喜歡，Movie2都已經係2010年既事，十二年後來個續篇，點聽，都唔對路，仲要因為Samantha同Carrie早已反檯，唔參與，喂，SATC最好睇係佢播下話。
於是續篇And Just Like That (AJLT)開播，一直抱住即管一看之心態，點知第一集感覺良好：幾位如實地年過五十，Carrie與Big幸福快樂，Charlotte兩個女都讀緊初中面對青春期煩惱，Miranda個仔直頭帶女番屋企訓，三位阿姐當然唔係夜夜笙歌去搵食，所以劇名這樣改，對路。然後第一集最尾就來個Mr. Big心臟病發，嘩，玩到咁大呀。
