2021年6月30日星期三

言論自由

我第一次被面書禁言廿四小時。

三月底,我在私人面書轉貼一篇新聞,寫了「死洋鬼子抹黑我國疫苗」的戲言,然後他說我散播仇恨。今天,他說我在Blog Facebook轉貼出走美國果位王子果篇訪問,用上FAGxxt這個字,散播仇恨。由於三個月兩舖散播仇恨,要停我一日。

我深深明白,個場係人地既,規矩都係佢定既,不過大家都知,強大的面書,所謂既Social Media Rules,從來有佢講無你講。第一件事究竟係個死字出事定係四個字加埋有問題,唔知。不過有理由相信,國家派左咁多censorship入主面書,果條紅線,任佢畫。

而且幽默感呢回事,亦係有文化差異,亦因人而異。只要有人比較敏感,又或者唔識講笑,自然立即著左,然後俾紅牌警告你。

面對面書這個現像,再加上其他種種,我,跟好多朋友一樣,都嘗試轉場。轉場之後實在太冷清。我不是要靠點擊率follow數目搵食開飯的所謂KOL,但我相信,我寫的,我轉貼的,我希望帶出的,能夠讓人有共鳴之餘,或者帶給別人快樂,也希望可以對於讀者有不同程度的inspiration。所以,讀到的人太少,這是問題。

我只是被禁止貼文俾Comment俾like一天,但這個月,我們失去很多很多,亦有很多人開始不發聲。

失去蘋果日報一星期,這份報紙不完美,但香港的實體報紙只有他敢說真話報導真相。他們是否被殺了呢?未必,可能有朝一日可以回來,但現實是,他們很多人被捕了,有些還不准保釋。

法律面前人人平等嗎?那麼,國安法面前呢?

就算暫時失去了蘋果,香港人繼續活著,不習慣是一定的,難過是一定的,香港變了樣又是一定的。但,追求真相與答案的心,我們還記不記得?

做人最怕乜都要人餵到埋口,咁樣好容易成為愚民被誤導被帶風向。

早幾日趕時間搭港鐵,一名女子與朋友指著最近有隻護膚品牌Sell「抗糖」。其中一個說:「哦我係Youtube睇過個廣告啦,Mirror果個(實為造星三阿Ben)同肥仔賣架嘛!但係成個廣告都無解釋乜野叫肌斷糖,咁做咩嗟。然後其友人回應:「你睇個廣告,「抗糖」之後打左粒星,然後解釋堆字細到咩,肯定呃人啦」

其實他們不會只看廣告接收什麼就相信什麼是好事來的,只不過,你想知答案,點解唔google一下呢?搵答案,就要靠自己。

就算有蘋果,或者其他傳媒,他們寫的報導的,有時可能並不夠清楚也不夠全面。當你還可以找到更多資訊的時候,為何不去找呢?

是啊,當我們還可以的時候,遲下係點,真係唔多樂觀。

然後,我們珍惜我們還擁有的自由,包括言論自由。但現時果一段紅線真係好飄忽,甚至現時法庭正在就「光復咩咩時代物物」八個字是否有港獨意思進行審訊,都未有定論,繼續拉繼續鎖。

我理解亦明白有人選擇收聲,小心為上,留住條命,先為上策。

反正,你覺得大部份香港人依家條氣會順咩?

咪玩啦。

2 則留言:

  1. 專登進來留個言。對抗 fb 不孤單,早早就沒有了 fb account。都是靠 rss 訂閱各 blog。

    回覆刪除