Omakase即係由廚師發辦你只係負責食，坐係壽司Bar附近等食通常代價不菲，因為師傅『通常』會選取最時令食材俾你，近千元應該係最低消費。而位於又係恆和鑽石大廈既壽司處今村午市套餐竟然都有Omakase，價錢，一百九十元。
我唔會大大聲話：好平呀！百九蚊一個Lunch就好多朋友黎講真係唔平，但，你睇下食乜，你可能會大大聲話：抵食呀！
前菜竟然有兩款再加麵豉湯，其中右手邊果個係凍鮟鱇肝配酸汁，醒胃好食。
刺身有呢幾件，質素可以，你唔能夠要求俾百九蚊食到頂級Toro，咁就真係Naive喇。
壽司黎喇！吞拿魚與及油甘魚，肥美嫩滑，嗯，有料到！
之後呢三件，我都唔記得乜魚打乜魚，總之件件都新鮮高質，果個銀色既仲整到咁靚加上醬油，我其實對於呢類有皮魚刺身壽司有抗拒，怕佢腥，呢件又無播！
未完未完！仲有牡丹蝦與及帶子壽司，唔駛我講，你見賣相都覺得唔會差得去邊！
喂仲有海膽軍艦與及鰻魚壽司播！你睇幾多海膽！
八件壽司之外仲有三件Toro小卷，夠飽夠滿足啦！
甜品呀！紅豆雪糕跟紅豆糕，點算點算點算？
呢件係島主追加醬油吞拿魚壽司，感覺完全不同。
即咁，我唔一定食貴，但如果唔值我寧願唔食：例如我寧願有時貪得意過口癮去超市買幾蚊件壽司，都唔會俾七八十蚊幫襯只值三四十蚊既板長板前，所以我與同事耐唔時寧願俾百鬆蚊去食太古城既那霸，都唔慳果三四十又要排隊去食板長，唔值丫嘛！
久唔久食豪少少，就食得物有所值！所以，你想久唔久食餐好，壽司處今村呢個午市選擇絕對不錯，不過要記住：座位有限，一定要訂位！
沒有留言:
發佈留言