一脫足成千古恨

書展未到已經有一大班少女準備以身體進攻會展，相信到時娛樂版又會有記者統計今年有幾多個波出現，噴血程度有幾勁。我已經沒有興趣討論書展應否賣少女寫真，而是為何有那麼多少女認為這是一條出路。

因為已經不是第一年有這類產品出現，於是，加入戰團的無論是新知舊雨，均開晒口擺到明有其賣點：新血好像個個也裸，但又聲明不露點，舊的就表明會激，都是那個原因：希望那班麻甩肯買。


跟朋友談起這現象，他有一番見解：「現時大學畢業出黎都可能無野做，咁不如搏一搏，紅左就固然好，唔紅有本錢露過，萬一俾有錢人睇中，可以再搵多筆。」

真的是這樣嗎？

記得早前去世的狄娜姐姐曾經表示，希望一眾少女要脫之時想清楚，因為一脫以後就有紀錄，脫星之名永遠跟著你，這是一世沒法磨滅的，無論你日後多努力轉型，當別人報導你的過去，這一塊砌圖一定再次出現。

舒淇也好像曾經說過，對於以前做的沒有後悔，但的確不想回頭望。

以上兩個都算是成功的例子，她們成功轉型，她們在事業上或者人生都有光輝的一頁，但她們都不大喜歡自己有這樣的過去。

試想想：你拍過性感寫真，雖然現時市面類似的太多，我想講得出名的都不知有幾多個，但這些推出市面的書是不會一下子消失的，你紅不起決定繼續唸書，或者轉行等等，你是否真的認為自己能夠坦然面對自己做過的事？

不怕被人竊竊私語評頭品足嗎？會不會覺得那個上司可能睇過自己的大作，然後跟其他同事談論「真人醜樣咁多」「咁既身材就咪出黎獻世」「我睇過啦！下次借你睇囉，都幾搏命架！」「當時我至得就係佢喇，睇到我ＸＸＸＸＸ呀！」

要更難聽的都還有，你，頂得住無？

好了，有沒有想過日後交男友或者要嫁人呢？你男友無睇過佢父母唔知道，點知擺酒當日唔知邊個親戚咁好眼力認出你，然後以訛傳訛傳番去老爺奶奶耳邊，知道你係脫星（但其實你又真係無露過三點播，幾唔抵呢可），成晚面黑黑，之後就同你算賬。

你望就望你老公真係愛你愛到乜都得你以前做乜都唔算意，否則，醒定少少啦。

是否我老土是否我誇張呢？我不知道，你們自己想想。或者一眾少女們好好學習外語，嫁個外國人，他們的想法可能不會介意，你又可以重頭來過。

我只是真正的相信，不是隨便露一露就可以一脫成名，你看現時肯露一露的有幾多，市面要的又有幾多。又或者看看現役那一班：有幾多個好似周秀娜已經成功升格？有幾多個Angelababy？又有幾多個像那些 Lavina Rainbow差在等幾時露晒都紅唔起？

總之，你當我老土怪好了，但我相信一露足成千古恨，而並不是個個能夠一露足成千股痕。