我看曼聯本球季

英超球季結束，奇蹟沒有發生，正如我之前一直跟一眾曼聯友好講，今年陣容如此都能夠蟬聯冠軍的話著實無天理，結果就算個心幾討厭車仔，問心果句實力上佢地囉又真係最合理。

回想當初賣走Ｃ七我無乜感覺，放走迪維斯嘈到拆天，不過家陣睇番，賣得岩，呢條友都係養唔熟，佢適合與果班睇錢份上既人一齊係曼城。作為一個曼聯迷，波唔算熟，但總有少少睇法，想分享一下：


首先講講偉大的老費：對於今年限米煮限飯，佢可算用到盡。當然，絕對不能話佢無出錯陣用錯人，例如若果歐聯第一回合已經用細孖，列貝利早已收皮，就未必會出局收場。不過總體黎講，佢老人家今年真係算係咁喇，人又唔夠用，傷兵一個接一個，想佢點丫。

講講球員：雲達沙真係無話可說地強，可惜係佢今年亦有受傷，間接影響球隊前段失分較多，若果唔係今年隊隊鬥失分，曼聯今年邊有可能仲有得玩到最後一周爭冠軍？至於另外兩位門將，古斯錫注定二奶命，賓科士打，下？慌失失程度令我懷念候活，至今都覺得佢應該有得留低。

後衛方面，兩個中堅有期傷到無人用要用費查卡域克，絕對係至慘烈既一期；李奧今年退步，維迪亦係，兩人並非最佳狀態；伊雲斯中規中矩，至叻就係俾杜奧巴穿心腿，佢續約四年亦係好事，畢竟佢打得算係咁，起碼肯定好過擺西布朗打中堅，嚇死好多細胞。

艾夫拿，鐵人，無得頂，當然有試過跌Watt，但整體真係好好架喇！唯一希望大孖唔好成日傷，咁就真係多個左閘用；至於右閘，我寧願用奧沙，都唔希望見到果位無速度跑得慢既加利佬！佢除左識擦鞋，加陣咁既狀態真係唔好再係度獻世喇！細孖先係曼聯前途！呢個小朋友各樣條件不俗，係要從經驗中成長，你唔俾機會佢，佢邊能夠成大器？佢出波突破Mark人都好過加利皇，真係，睇佢喇！

講講兩翼：蘭尼下半季回歸真係無乜令人失望，大熟大勇，更好就係佢唔會似佢果位偉大師兄鍾意擺款扮踢與及叉腰，放佢踢左邊係減低佢戰鬥力，但佢都交足功課呀！至於華能西，係，越踢越似番個人，但實力真係並非超班，相信可以有更好既球員踢呢個位。至於星仔，佢根本唔係踢翼材料，只係客串佢又交到功課，不過佢今年做後上中場真係好出色，而且Finishing大有進步，佢與費查，係本年度我至愛中場，費查有幾好，我相信大家都有眼見！原來，一件廢柴真係可以不再廢仲好，狠，有用！佢除左搏命，佢今年交波之進步，係絕對另一大驚喜！

至於兩老，傑斯好左上半季，下半季麻麻，而史高斯同佢岩岩相反。兩老續約，希望下年佢地都唔再係主打，係的話，好大件事。反而今年最令我失望，係卡域克！表現飄忽，遠射大部份無料到，拍波又唔掂，交波又失準，想點呀佢？另外上半季出現既安達臣，此子已經見底，都係無架喇。新果位吉遜，未了解佢究竟係勁定係一時時，對拜仁第二回合打到識飛，大部份時間亂遠射，交波唔得拍波麻麻，睇多幾場至講。

前鋒嘛，朗尼都唔駛我讚，大家有眼睇，日後佢做隊長亦非常適合；奧雲其實算係咁，經驗足走位好，往往有驚喜；果隻馬尾，麻煩送走佢啦，馬捷達我依然寄予厚望，相信佢大把前途。

至於保加利亞之星貝九，你踢波似耍太極，算；你唔上力唔追波，都算；但係攻攻下個波去到你果度就拖慢，扭多兩扭甩埋，火都黎；下半季成日踢踢下腳軟跣低，真係不知所謂，仲要發脾氣播！你腳風唔好再加Finishing差到爆，我都唔知你仲有乜資格踢曼聯！你呀，走把啦你！唔係你踢得咁勁，對布力般和左，家陣駛得第二？

講到尾，至衰都係班美國佬！幾時先可以送走呢班吸血鬼？再咁落去，曼聯想有好日子過都難呀！

好，乜都假，過左世界盃，睇下真係買乜野人，先量算下一季仲有冇機會！球季結束，我就真係可以乖乖地溫書喇！