第一次與第二次食既都有唔同，坐既位置大不同，因為第二次Booked到窗口位，可以一邊食一邊睇夜景，幾高興架！不如睇相食過乜啦！
前菜六碟，唔夠再俾你（我睇怕係因為我地食得多先咁好）
第一次食呢個係已醃製，份量多到呢，飽到你飛起，而且醃得非常好食，不過可能因為醃左，越食越膩。
好喇，第二次，食原味！發現原味仲精彩過醃左，牛柳牛舌超級掂，係擺入口果股牛味令你唔知點算好既濃與香；另外切到薄一薄既腩肉亦一流，因為夠薄，唔駛燒好耐，真係五花腩一層肥一層瘦，勁正！
第二餐另叫海蝦，嘩哈哈，鮮甜大隻彈牙，配上特別既鹽油醬料，真係唔好講笑，不得了！
韓式牛肉他他，係至今本地食過至好食既！侍應會幫你撈好，然後你一食會發現，牛鮮而且加上雪梨條既甜，第一次食生牛肉係有鮮甜既感覺，牛肉條粗幼剛剛好，醃製沒有過火，一切配合得天衣無縫！
韓式牛腸，同樣係第一晚，結果飽到飛起，此碟亦要打包大部份走。牛腸係牛粉腸，難得入味之餘又夠香辣，一邊食一邊流汗，醬料出色，用黎送飯係一流！我打包果盒，第二日煮個辛辣麵撈黎食，Wow Wow wow wow WOW！
第二餐點左呢個，係乜？睇番我第一篇介紹午市果陣，你會清楚晒！水準保持，開胃透心涼！
第二晚高潮（之後再反高潮）既辣牛雜鍋！！！首先，咪以為只得肉肉肉，入面極多蔬菜；其次，裡面已經入味到暈既烏冬，配合呢個湯，真係好難抗拒！牛雜者，其實係牛腸與牛展，唔駛講，一樣極入味！
正當我與島主食得興高采烈之陣，島主食到一塊膠－－係，正確黎講，應該係一塊保鮮紙。我地立即向經理反映，佢與一名韓籍高層好快前來了解，並解釋應該係包住肉類既保鮮紙唔小心煮埋落去。佢問我地駛唔駛換過鍋，唔喇，照食啦，只係提醒佢地小心ｄ。（＊由此可見阿島主係咪好Gentleman呢！）
第二餐埋單，無要求過乜，佢將個牛雜鍋價錢減半，另外免我地加一，嗯，此店服務係好唔錯，我地第一餐係平日去，不斷幫我地換燒烤網，非常體貼。
原本唔想搶閘寫，不過突然醒起，佢五月做緊十四周年Promotion，星期一至四全日八五折！
快快手介紹，等你地去享受下，記住，想坐窗口位，一定要預訂。
沒有留言:
發佈留言