當然知道佢唱歌，追得電視劇就自自然然鍾意主題曲插曲，所以用愛將心偷、萬水千山總是情、勇敢的中國人、與及有一首好記得叫郎歸晚當年細細個都識唱。除此以外，當年必睇電視節目就係金唱片頒獎禮，唔知點解見親佢唱熱咖啡與及迷人Pink Lady都非常開心。
果陣可能覺得佢形象前衛又百變，咁，當年我都有聽甄妮姐姐同小鳳姐既。
不過唔記得由幾時開始，有ｄ怕聽佢唱歌。無記錯應該係秋謹主題曲與及楊門女將主題曲，同樣係年紀細細，但覺得有少少鬼喳咁聲既感覺，當然，尚未反感，還可接受。
但我依然覺得，汪阿姐拍戲係幾好睇，佢演技真係唔錯。
仲有，每年歡樂滿東華，至期待係明荃之友會摺隻乜野銀紙東東黎籌款，細細個，覺得呢樣野都幾架勢。
之後佢醉心粵劇，無乜唱流行曲，我唔知佢唱粵曲唱成點，不過識聽既長輩就話佢唱得好麻麻，只不過佢真係夠勤力。不過肯定既係，佢想做又真係好投入去做，所以佢落手落腳推動粵劇發展，唔係玩玩下。
期間佢又無啦啦唱下流行曲，到依家都仲記得兩朵太陽花，與及『啦啦啦啦真的多謝，啦啦啦啦情熱凍咖啡』，嘩，聽到真係醒晒。
有一個好深刻印象係：佢某年做楊千嬅小姐演唱會嘉賓，兩人合唱少女的祈禱。當時與朋友傾開，覺得佢兩個有樣野好似：唱功麻麻，觀眾緣一流。
近年佢多左拍戲，好睇既都唔少，最深印象係婚前昏後與及野蠻奶奶，近期女皇辦公室都幾好笑，無錯，拍劇呢家野，佢真係有把握有餘。
不過佢唱歌，嗯，真係越黎越得人驚。
荃加福祿壽每晚佢至少唱兩隻歌，播左九集，令人不安既演出真係可以與三位扮野高手既爆笑演出成正比例，當中最深印象肯定係汪阿姐唱給自己的情書，嘩，我完全唔明白點解可以播出街，甩拍子走音鬼喳咁聲，我諗除左佢Fans，都無乜邊個接受到。
係，我真係接受唔到囉。
其次與千嬅合唱少女的祈禱，楊小姐已經唱得普普通通，點知阿姐將粵劇腔配合唔夠氣，成件事搶晒，千嬅唱成點？我唔記得喇，淨係覺得阿姐好囉命。
於是有人提議叫佢唔好再唱，無線個答覆好有趣：話個節目要顧及唔同觀眾層既需要喎。其實唔明：又唔係名曲滿天星，點解一定要汪阿姐唱歌呢？
我絕對欣賞佢集集前衛有創意既造型，但係佢唱歌真係，令人不安。
尋晚果集，無線照俾佢唱，不過用左另一方法減低不安度：就係叫福祿壽同佢合唱，減少佢獨唱機會，不過，始終佢一唱，真係好勉強。When A Child Is Born可能聽到個BB要訓幾晚氧氣箱，今晚夜一開口啦，陳潔靈若果係超級巨聲評判，會點樣話佢呢可？
有ｄ野，真係唔可以夾硬黎，阿姐年事已高，但佢拍戲寶刀未老，點解要叫佢主持呢個節目仲要唱咁多首歌呢？唔知佢Enjoy與否，但作為觀眾，真係一見佢開金口就轉台轉唔切，倒不如將個節目改成半粒鐘，會唔會大家好過少少呢？
相信無線唔會改架喇，大家唯有繼續一聽佢唱歌就Mute左電視或者轉台，又或者，照聽，睇下幾頂癮，都不失為另一種娛樂。
沒有留言:
發佈留言