海鮮直輸的榮川

四月初某晚與島主開飯，佢話想去試菜，咁我又有乜所謂？於是到達恆和鑽石大廈的榮川日本料理。根據島主指，此店海鮮由日本直接進口，所以新鮮與及價錢唔太貴。

店子裝修不華麗，但很有日本小店的感覺，而且坐滿了人，都像一批批熟客。正因如此，我們被安排坐在壽司吧那邊，而且非常近那些放海鮮的魚缸。的確，有點魚腥味，這是有些失策的設計。


既然海鮮日本直輸，當然要吃刺身啦！先看看這個：

基本上無乜邊樣唔好食，係肥美鮮甜，特別果兩隻大到嚇死人既蝦，佢仲會幫你將蝦頭炸香，又多一款食物！

未算炸得好出色，但好食香口，算不錯。

以上兩款係我唔識佢但我好鍾意食既刺身：上圖果款叫魴鮄，原條切薄片配以調得剛剛好酸醋汁，好得好得；後者叫櫻鯛，一條魚就片兩大片肉，廚師先將魚皮微烤，成為兩件壽司，嗯，以為會好腥，點知，真係，清甜魚味，正！島主話，廚師刀功並唔算好出色，但食材掂，乜都補番晒。

不如睇睇炸物：先黎呢個炸軟殼蟹：

香口咬落有蟹膏，炸漿薄薄，好滿意！估唔到，串燒仲勁！

無諗過呢個煙肉帶子串咁精彩！帶子係肥美，而且咁既組合，加少少檸檬汁，煙肉咸香加上帶子鮮甜，一絕！

左牛白舌右白鱔，牛舌，你睇到啦，咁厚身又燒得唔錯，好少有架！白鱔，本身麻麻地燒鱔，但呢個好食播，島主就對於白鱔讚不絕口！


最後將之前刺身魴鮄魚骨煮成野菜豆腐湯，鮮甜湯底日本濃豆味豆腐，埋單清清腸胃，不俗！

此店老細嘛，見我們吃的也不少，立即過來搭訕。講到咁，你明啦可？

總結，刺身出色，串燒估唔到咁好食，服務一般般啦。