我從來都覺得有好野要同大家分享，從來都無乜野Best Kept Secret既食店（暫時無啦，我都諗唔起），所以，以下介紹呢間位於美孚既上海飯店我一直都想話俾大家知佢有幾正，但，每次都同成班蝗蟲村朋友一齊食，每碟菜一落檯想影相？傻啦，唔駛食咩！
我想我有自知之名：文筆並不特別好，並不能夠齋靠介紹講出有幾好食，所以，相片是重要的。今次終於有機會！因為，今次只係五人開飯。
此店有乜咁掂？簡單黎講三個字：平靚正。無裝修服務尚可但上海菜式正宗，雖然今晚五個人食，但我地都食唔少播！
口水雞，先講一定係汁！呢個汁麻而不算好辣但香，係好食到你好想有個炒米粉或者粉皮用黎撈，當中有腰果碎，所以好出色！雞嫩滑無乜雪味，總之，好快就俾人KO，連汁都撈埋啦！
咪就係油炆筍囉！呢個好有水準，但係好戲在後頭．．．
係乜呢？油炆筊白筍，據知係抗骨質疏鬆既蔬菜類高手，而呢種肥美既白筍，非常清甜，即點解呢碟係熱既主菜油炆筍係冷盤係有佢原因！
即咪睇呢個鍋貼平平無奇，點知一咬，嗯，湯汁滿溢，我明白點解朋友既媽媽咁鍾意食。
紅油抄手，雲吞漲卜卜，呢個醬汁又係掂，唔會搶晒味但辣得剛剛好好過癮。
上海粗炒其實一直不是我杯茶，因為好肥膩，呢個就相對地可以，特別將口水雞汁撈一撈，嘩！
清清地，黎一個咸肉湯年糕，喜歡，因為足料好食。
是夜極品推介：黑醋骨！黑醋香甜骨肥瘦適中而且入味，每一件都被醬汁包圍，呢道菜，跟菜飯的話，Perfect Match！
酒釀丸子，今晚有少少失準，酒與桂花均不夠香，但丸子好多，合格既！
其實每一道菜都係例牌，份量並唔特別多，所以五個人食晒岩岩好。我與蝗蟲村朋友們已經被呢間店子認實：因為食得多食得快，極速交檯。就如今晚，唔駛四十五分鐘食完，期間仲引來其他食客望我地食乜，你話啦，又快交檯又宣傳易，邊會唔鍾意我地？
講到尾，埋單幾錢先？以上食物加五人茶位，四百蚊啦。我終於對得住你地，話你地知呢間舖有幾筍，記住，要訂位！
沒有留言:
發佈留言