食在太古(5)終於到康怡

係，好耐無寫食。終於有喇！食在太古第五集，介紹三間舖頭，中菜西餐都有，有你地識，有你地唔熟既。

首先介紹呢間都仲位於太古城衛星閣樓下雅敘一堂，同事帶去，表示大廚係酒店出身，賣中菜仲有炒飯麵飯。

當日叫左個套餐，介紹下先：

花膠燉湯一個，材料好足，我意思係個盅入面，湯呢？好飲既。

我無記錯好似叫黑松露菌素翅賽旁蟹，乾身，無乜特別，另外跟個飯：

仲有一杯無記錯係山渣汁，整個餐，七十蚊左右。食完，好口乾，即係好重味精，係咁先。

轉台：位於太古城中心五樓既Ruby Tuesday，唔係有Coupon都唔會考慮去食，午餐五十幾到舊幾水，當日食左以下東東：

麵包好食，但呢個龍蝦湯係好好好好飲，食過兩次都係咁好飲。

俾侍仔昆左既焗薯皮，十五蚊咁既貨色，挑！

朋友叫既Crab Cake，佢話極唔掂，我試過，唔知點解咁貴，幾麻麻。

我呢個Rib Eye，真係五成熟，唔錯，收貨既。

不過第二次再去食，除左龍蝦湯，其他真係好普通，都係果句：無Coupon，唔去。

好，終於殺到去康怡喇，幫襯呢間個名好長既日式西餐店：鐮倉和茶房夢見屋。同事話呢間舖頭肯定有位，價錢唔貴：

波菜忌廉汁意粉，白湯，沙律。要飲咖啡跟Cake要加錢。意粉普普通通，後來件Cake又係普普通通，總體比Pokka Cafe平，質素亦比Pokka Cafe差，唯一好處真係：位置隱閉，你實搵到位。

同事遭遇唔多好：第一碟無啦啦個日式咖喱好辣，第二碟好咸，結果，取消晒，無食到。

今次介紹三間都麻麻地，目的係乜？叫你地小心囉！