強颱東京之旅：吉烈牛與牛舌

我同意，日本真係是但入一間餐廳質素都唔會差得去邊，不過想食乜，點都要做少少功課既。所以，咁鍾意食牛，我當然會搵一搵有冇餐廳真係要去啦。

今次就食左一餐吉烈牛，一餐牛舌，兩家都有分店既，可能你地都食過，但又的確好食又抵食播！

首先介紹吉烈牛呢間叫牛かつもと村，全日本超過廿間分店，專做吉烈牛定食。當晚主要係我發神經，由台場行到去大叔的愛場景豐州公園，再搭車番出新橋，基本上已經超肚餓，朋友就肯定都餓，咁行去新橋店，咁岩做緊明太子期間限定播！

套餐應該係三千幾Yen，有乜呢？介紹下先：

 

留意番，係有兩大塊吉烈牛！而且質素你地見啦，入面真係嫩紅色架！仲有塊發熱陶板俾你整熟少少配合不同喜好朋友食，加少少鹽，真係好食到不得了！另外椰菜絲啦亦有醬汁俾你撈，果一球薯仔沙律亦好有水準架！

右下角果一碟係就係明太子，咁應該點食呢？

我就將兜山藥加明太子撈落十穀飯，基本上咁樣碗飯都非常得架喇！再加埋吉烈牛，呢個餐，真係好想再食，再食再食再食！

後來我地發現新宿都有舖頭，不過就無明太子喇！

跟住介紹食牛舌呢間叫Negishi，都係好多分店既！此店專做牛舌定食，而其他配料亦非常講究，最重要，又係抵食兼好食！佢地用既牛都係愛爾蘭同澳洲，其實最重要質素如何呢？

我地揀左呢款有三種炭烤牛舌，分別係比較有咬勁既，切得較薄既與及雪花牛舌，成個套餐1950yen咋！牛舌之餘一定要介紹呢碗係麥片飯，好健康又高纖維，另外左上角係大和芋蓉，千葉縣多古町直送。

三種牛舌口感與味道都有唔同，最重要店家真係烤得剛剛好，啖啖都咁好食！

 

仲有味噌南蠻醬菜，與及一定要力推既牛尾清湯！無諗過套餐跟呢個咁好飲咁清甜既牛尾湯，真係無得彈架！

呢間就仲多分店，自己搵搵有無興趣去食下啦！