合家歡餐廳：The Stadium

當有番咁上下年紀，飯聚有時不再是同學之間的聚會，而是同學與家人之間的聚會。成家立室的多了，聚會可能要有個合家歡的地方。住所的Club house可能是不錯的選擇，要出外吃的話就多數要去中式酒樓了，其實有冇其他選擇？

最近到過銅鑼灣The Stadium，完全是發現新大陸：首先男人聚頭睇波是非常適合，又有大電視飲飲食食又唔貴；小朋友呢？餐廳又有小朋友玩樂的東東（例如足球機之類），地方又夠大，好幾個家庭聚會開餐，應該都無問題。

非常抱歉我無影到玩樂設施照片，今次主要想介紹食物。作為一家睇波餐廳既食物，此店價錢合理，質素亦非常不俗，而且仲有套餐添：

磨菇湯，鮮打果隻，每一啖都好有質感亦有菇香，唔駛講水準如何，交足功課就夠喇。

 

無呀，想話檸茶個紅茶係幾唔錯，不過環保用紙飲筒真係唔多Work。另外俾你飲水呢隻杯，好靚，唔知有冇得賣呢可？

呢個Nachos係另外點既：有芝士有sour cream有牛油果醬有紅腰豆有肉醬又有辣椒，本人好愛食Nachos但真係要整得好食，若果唔係你開一包俾我點Sour cream牛油果醬算喇。呢個合乎水準。

呢個鵝肝安格斯牛肉漢堡，係好好好好好食既！牛肉夠Juicy有牛味，鵝肝煎得香口，加上蕃茄車打芝士洋蔥等等，極之滿足；另外都見啦，薯條都好有水準架！呢個連湯加飲品，HK$188。

呢個又係極之推介：美國極黑毛豬，寫到明只會煮到medium well，非常嫩滑，配上生果，此豬扒係高幾個層次，所以，仲貴過漢堡！

據知此處除左有波睇，仲有拳賽啦，唔知仲有乜野大型體育比賽直播，因為勝在地方夠大。另外仲有下午茶與及happy hours，我就肯定會再去喇！