胡志明的味道：B3 steakhouse

位於胡志明大會堂附近，當然是遊客區，同時亦是本人搵食重點地區。其中愛牛的我，去年首次到訪已經愛上的B3 steakhouse and craft beer，好食程度是今年落機放低行李唔駛諗美味之選。

此店主打紐西蘭草飼牛，而B3=beef, beer and buddies，啤酒當然好啦！仲要多選擇！而且唔訂位通常只可搏吧檯。不過就算吧檯都殺，好食丫嘛！

 

啤酒，我都唔記得飲左邊隻，只記得係問左侍應介紹，佢話配牛扒最岩。

前菜，極邪惡，和牛煎鵝肝多士，放入口一咬，油香爆發，加少許海鹽吊味更加精彩！

上年呢，就食左呢個沙律既，樣樣都新鮮靚仔，無投訴架！

上年就比較貪心，仲揀左呢個意大利粉團，得架喇，見到芝士同鮮茄醬汁，幾肥都唔會記得。

其實呢度牛扒非常講究，第一次我食左呢個：

 

無記錯係Oyster Blade，牛肩，嗯，我最鍾意咁生架喇！

今年我就揀左Terderloin Filet Steak，好厚，好大件：

  

係咪好勁先？可以選兩款醬汁，而且蒜頭烤得好香。

 

至於side dishes，除左忌廉菠菜，我仲揀左普羅旺斯雜菜：

特別推介後者，真係兜仔細細但煮得好好味，仲要砌到咁靚仔播！

記住喇，有機會去胡志明市，呢間扒真係極得，環境好氣氛又好，無介紹錯架！