強颱東京之旅：東新宿深夜食堂

雖則曾經話過，希望築地搬之前再去多次，不過講就有實質行動又未有，畢竟工作都已經成日飛。然後有朋友話我知，廉航十一前後出發機票喪平，咁我又無乜所謂試下廉航播。

結果，今次同朋友出遊東京，期間強颱風吹襲，身處東京之時發現香港親朋紛紛問候，而我地又真係平平安安玩足幾日（詳程有機會講講）。好喇，廉航初體驗係唔錯既，俾多幾舊水就可以囉埋20KG行李，飛機快靚正，雖然無電視睇無野食（講到呢度，你帶少少野食上去佢唔話你，你一食薯片話者好高調開餐就有空姐埋黎話唔俾），所以，短途真係絕對無問題既。

由於飛機十一點九到羽田，而今次選住東新宿果邊既酒店，轉車又轉車行到酒店都點半喇，肚餓就必然架喇！好彩一早做定功課，知道酒店附近有幾間開到夜一夜既，所以，兩點幾，去左食壽司三味，一家開廿四既壽司店。

入到去，坐係壽司吧檯，當晚星期六半夜，仲有唔少日本客。同侍應講兩句就提供英文Menu，於是就慢慢有得食，仲有幾位師傅係你面前整，好專業架！

 

先介紹呢個你可能會話和民都係咁上下既沙律，信我啦，和民肯定無呢個質素，而且整到同餐牌差唔多樣播！880Yen

 

然後仲有個2000yen壽司Set，是的，對於開廿四，你不能夠要求食物超靚仔，不過你地睇，覺得係咪無投訴先！

 

重有呢碗超大碗既味噌湯，唔係沖粉既味噌湯，當晚落住雨有少少涼，呢碗湯，特別好飲。

 

 

是的，仲有散叫壽司，價錢由98yen一件到最貴既海膽軍艦498yen，師傅真係即叫即整，係咪好感動呢！

好，介紹完呢一間，講講星期日打到黎。當日下午已經被通知JR八點後停駛，根據飯糰先生表示極少發生，所以都叫我地睇住時間唔好玩咁夜；另外問我住日本既朋友，教我上日本地鐵網站Check最新情況，當時人在涉谷，總之肯定果條線番到東新宿就得喇。

不過就算你想繼續玩都無得你玩，因為涉谷店舖6:30pm通通閂門，員工安全要緊生意放埋一邊，既然如此，我同朋友都走喇，而當時眼見連地鐵站內籮神都閂，開始擔心今晚無野食，於是連入錢買既麵包都買定兩個走。點知去到酒店附近東新宿，間間便利店開門，然後我地係東新宿APA酒店地庫有一家叫海鮮居酒屋築地市場298，食左非常開心既一餐。

呢間係咁既：餐牌入面九成食物飲品乜乜乜，樣樣298Yen一客，抵到你唔信，於是人既心理就係咁，平丫嘛，叫多Ｄ叫多Ｄ叫多Ｄ，連Highball都係298Yen一杯，試完呢杯再試第二杯！

 

 

 

 

真係無花無假，仲要有水準堅好食，串燒六串當然無咁平啦（就當兩碟價錢），炸雞極得又Juicy，仲食左期間限定雞皮煎餃，肯定好肥但極好食。

 

 此雞軟骨串係要特別介紹，我就無係香港食過真係唔駛要你趙既雞軟骨，佢呢個係鬆化既，完全無諗過係咁！

仲有播，呢度刺身呀壽司呀飯麵連原條烤魚都有，我見過其他人點，真係得架播，所以呢間要記得再食喇！不過佢聲稱開到零晨四點，有一晚我地點幾去到佢就話閂門，真係失望囉！

但又抵又有質素既深夜食堂，真係不能夠唔介紹過你地知呀！