馬拉吃中菜：迎客樓

當地同事表示馬來西亞客家菜要食，其實對於客家菜印象一向不錯，所以某日佢地帶左我去一家叫「迎客樓」開飯。

其實迎客樓都唔少分店，勝在價錢唔貴而且味道又確實唔錯，當日幾個人食得非常高興，只係嫌部份男同事實在細食過女士呢下奇怪。

 

佢地叫老鼠粉，即係我地既銀針粉，配上肉碎與及大大件肉餅，配料唔肥（我知，銀針粉本身都油丫嘛），好好食，可以隊晒。

算盤子，此店名菜。用上芋泥用木薯粉搓成粉團，淥熟，再用肉碎蝦米香菇魚露木耳去炒，呢個又係唔試唔得，質感過癮味道唔濃。

 

黃酒煮蝦，首先個湯好好飲，清得黎又有酒香與及帶辣，蝦當然入味但佢無特別調味，所以好原味，有人可能覺得太淡。

客家釀三寶，每件都極極極之飽滿而且好食，鯪魚肉無半點腥味，苦瓜都非常出色。

咸菜胡椒豬肚湯，得呀！飲呢個再加黃酒個湯，成個人暖晒（但我係馬來西亞果幾日喪熱囉）。

香酥肉，最最簡單，點一點蒜醋就好好味，用黎同銀針粉一齊食，豬三味（肉碎肉餅香酥肉），一流！

全場唯一女士指定一定要食呢個甜品，名我就唔記得，係炸芋絲包住芋蓉，少許油膩，但清甜，係好好食，我明白點解佢堅持食呢個。

我諗下次黎馬來西亞我會有興趣再食呢個，大前題係，唔可能一條友去囉。