北京公幹（上）

一連三天的北京之行，實質只有約四十八小時，而當中工作都用了不少時間，所以實在可以寫的不多。不過雖然如此，能夠見見老同學，能夠與公司北京的同事好好的聊，又能夠在工作上有所得著，這行是非常值得的。

公司安排下塌的酒台是Traders Hotel，這酒店為工幹人士而設，所以酒店房內設備齊全：熨斗，熨衫板，提供免費擦鞋，有齊應要文具等等。房間夠闊，洗手間亦是，基本上非常滿意。連原本話無既wifi都喜出望外地有（佢有broadband提供），最重要係，酒店房位於七樓，房外個View極好：

第一日勁大霧，第二晚好轉喇，第三朝幾清！證明我成日係酒店無乜去邊度。

由於可以四處走時間有限，第一天安頓之後乖地鐵去南鑼鼓巷，原來由張自忠路站行過去都幾係野。去到，連巷口都俾人郁埋，因為起地鐵站！走一遍，感覺差不多，但有些小店不見了，亦沒有買什麼東西。之後在附近一間叫零點牛肉炒手既小店醫肚，睇過我食左乜：

四川酸辣粉，小碗，七蚊人仔。首先當地酸辣雖然勁，但食落係順喉，你唔會覺得好搶好辛苦，所以天氣稍冷，食埋呢個真係好得，當然我仲有配菜啦！

呢個四片麻辣香腸，好似Salami，但食落真係麻辣，廿蚊人仔，好味到爆，真係好想問佢地邊度有得賣！

下一站出發往王府井，因為稍後約老同學食飯，同時希望在唱片店走走。結果東方新天地的FAB已經無左，最後只去了王府井圖書店地庫，都有收獲：齊秦《美麗境界》，Olivia Ong《Romance》，毛阿敏全新唱片《腔調》與及幾張DVD：《唐山大地震》、《非誠勿擾２》及《將愛情進行到底》。以上咁多，兩百人仔。

晚上同學帶我去北京Westin Hotel扒房Grunge食飯。聚頭其實食乜都開心，因為大家久不久見面都有好多話題，而呢間店因為同學係酒店會員，所以想黎試下。結果點呢？扒房裝修好靚，我地仲坐窗口邊，食物就如下（圖片勁黑）：

呢個麵包好好食！佢將幾款麵包一齊焗，另外四款醬有芝士，香草，橄欖與牛油，好食好食！

呢個前菜意大利生牛肉係好食，夠多，而且個調味亦佳。滿意！

呢件西冷就唔得喇！澳洲喎，三舊幾水人仔喎，同佢講五成佢俾七成我，都算！無牛味喎！同學點另一款，意見一樣，無牛味！我地同一意見就係：其他樣樣好，唔好叫自己做扒房味好地地囉，做pasta一樣得架！

呢兩個Side dishes係好滿意：新鮮，爽脆，Juicy，調味恰到好處！

最後埋尾呢杯咖啡又係無話可說地好，果件細細既Brownie超好食，你話丫，樣樣好，扒唔好，點叫扒房先？

好，之後介紹埋剩低既，第二晚果餐好精彩亦好地道。