台北深秋行：食不停（上）

除了已介紹幾間之外，我當然有吃其他東西！首先要告知大家：馬辣現時在台北已有四間分店，除公館老店及西門店之外，另外有忠孝店及信義店。我於星期日晚吃了，早一晚致電訂位都要九點半先有得食，不過可以告訴你們，水準保持一樣食得咁開心，每次來台必到。

我明白半夜三更有類似文章出現是很殘忍的，不過，要我再次回憶當時的美味，對我何嘗又不是殘忍呢？

係，西門町的鴨肉扁老店，由當年第一次去台北睇旅遊書介紹至今，我先係第一次幫襯。首先，呢個鴨果然好好食，有煙燻既香，又唔係鹵水播，總之好味之餘真係骨都可以咬出味，另外呢個新竹米粉，湯頭淡淡地，配呢個鴨真係一絕！

今次住福泰桔子館前店，基本上係讚不絕口，地點便利樣樣都好唔錯，除左望出去係街景但，Who Care?係附近有一位老伯伯擺檔，賣以上呢個餅餅，一個係奶黃一個係豆沙，重點係熱辣辣兩個都係十蚊台幣！仲要好食播！我就至愛奶黃喇，本來諗住再安哥，不過第二晚可能天氣唔好定係星期日，佢無開檔。

酒店樓下有台式奶茶店之外仲有繼光香香雞，咁無理由唔買份食下，好食，不過唔知點解我食親都有軟骨，我朋友食就舊舊都無事。記住，要辣先好食。

酒店附近一間舊舖頭仔，掃左呢個鍋貼番黎，八件四十蚊台幣，唔錯，充滿湯汁。

西門町有個位有兩間賣白苦瓜汁舖頭，呢間苦瓜大王明顯受歡迎好多，相信都係旅遊書既力量。老闆娘好識做，仲叫我囉住個白苦瓜影相。

去完女巫店，係臺壹整左個愛玉檸檬冰，唔係唔想食出名果隻，不過實在飽，所以都係揀番愛玉。

呢間酒店包早餐，不過就係囉餐券去附近丹迪咖啡食，選擇都好多，你見以上呢兩款就係我至愛，另外跟一杯咖啡加一杯果汁。

係，有去淡水，當日仲要落雨落到痴線。第一樣係淡水捷運外賣既有餡魚仔，紅豆味與奶黃味，餡少，所以唔好買。洪媽酸梅湯的確醒胃，但都不及蝦捲正，真係熱氣都係咁話，香口到爆。

落大雨去寧夏夜市，食左一間餐廳遲下介紹，唔忿氣點都要掃小食番酒店。呢間碳燒實在旺場，而且老闆們好有性格。我買左一份鹽酥雞，一大塊炸雞扒與及一塊芝士豬扒同我朋友一齊食，都係果句，熱氣都係咁話，勁正！另外呢條台灣腸，無理由唔食啦下話！

去完華山行經農業品周日市場，買左呢杯柿沙冰，純柿汁，鮮甜解渴，因為柿靚，所以呢杯真係有機會都買唔番。

臨上機前都唔放過，桃園機場一號大樓裝修到亂晒籠都仲有呢間，好鬼地道價錢都唔算貴，而且個鹵肉飯仲好好食添！

無錯，仲有三間舖頭，下次一篇介紹晒。最後貼張俾你地懷念下：