一九台北trip：大稻埕又行又食（上）

點解次次去台北？因為總有我無去過或者無細心走走的地方，例如今次住寧夏夜市附近，大埕就係一直想去但無去的地方，終於今次可以，自己行又有，跟熟路朋友吃吃喝喝又有。

大稻埕好多小店，而且將老店活化；另外，街市又好行老牌食店又多，要食得好又得。仲有，我試過由大稻埕碼頭公園睇住日落行去西門町，舒服又靚景，經此一遊，開始愛上大稻埕。


首先想行街買買買或者影影影文青朋友，舖頭好有特色，兩三層高古舊建築物好有感覺，從將葉金塗老宅改建的星巴克，百年醫院改建成咖啡店，不同文藝小店又或者雜貨店，慢慢行，慢慢逛。

 

 

大稻埕碼頭公園要去的原因是河畔風景，若果你踏單車，更值得去。

 

介紹食，想先介紹保安星巴克對面，有一家好有名的太子油飯。留意番，無得即時食，但你可以落Order，兩日後有得囉。由於係同事介紹話好好食，我當然唔執輸，訂左一盒。臨走果朝去囉（開九點半），店家話你依家食完全唔駛加熱：

 

此乃如意油飯，有大大隻雞脾，油飯內有香菇瘦肉同蝦米，油飯係糯米用鹵汁煮，好好食，但亦非常之飽。呢盒NT$175。

至於我次次經過都忍唔住係寧夏夜市買野食，同事就話，果邊有兩間豆花店，一定要食果間叫古早味：

 

 

我淨係要綠豆同豆花，已經好好食，因為清甜唔膩豆花又滑，仲要只係NT$50，難怪日本孤獨的美食家都介紹過啦。

 

 

所住附近好多早餐選擇，呢間四海豆漿大王係同事推介。首先，一份蔥蛋餅一份蘿蔔糕一杯凍豆漿只係NT$75，豆漿好飲，天然野，蘿蔔糕呢個我日日食都得，外脆內軟好香口，蛋餅就有少少咸但都好好食。

 

紅燒肉！老老實實，我一直唔知紅燒肉可以咁好食，或者以前食親都係製好柴柴果隻，完全無好感！有朝跟好識食既香港朋友四圍行，帶左我去街市呢檔《阿角紅燒肉劉美麗》，原本點一碟但見唔係好大碟再點多碟，店家就俾四個部位我地：基本紅燒肉，三層肉，前腿肉，松阪。第一次食咁新鮮即炸既紅燒肉，紅糟味滿溢，肉又香又脆口，四款各有特色，我就最愛三層肉與及前腿肉！記住，黎大稻埕，呢家一定要去一定要食！