借肚生仔的好處

果真是百歲唔死都有新聞：富豪大公子一直單身，緋聞都唔多聽見，失驚無神話借肚生仔生左三胞胎，仲要見富豪一臉滿足抱住三粒孫。

上頭版絕不奇，因為始終都是一件大事，至於道德問題相信好多朋友都發表了意見，不如換另一角度睇睇呢件事：究竟是次本地創舉對於一眾富豪有乜啟示呢？

首先，富豪最怕第二代多新聞。結識另一半肯定是本地狗仔隊關注之事，帶邊個去Ball果位乜背景靚定唔靚一一被報導。就算你唔多高調，一個唔該分左手，攪到唔清唔楚，又有料俾人爆，你話幾煩！

俾佢真係結婚，婚禮又要大攪，又要招呼呢個果個，然後次次俾人問幾時生番件，仲要囉黎同其他富豪太太比較。

千祈唔好忘記：呢位新袍又有一家人，又多左本人會影響自己家族名聲，仲要控制唔到架播！

以上一切最佳例子當然係千億子淇啦！

好喇，借肚生仔，至少唔駛擔心以上事情，你班記者咁把炮即管去搵個代母出黎。

富豪做呢件事，肯定用唔少錢，精挑細選一個高質代母，仲要簽晒合約，爆親料都有手尾跟果隻，點會咁易俾你地搵到呀！

另外，對於一眾本來無可能結婚生子富豪第二代，呢次創舉實在知得太遲，早知就唔駛唔知去邊度搵個女人扮結婚，仲要同佢扮恩愛，慘慘慘。

由於借肚生仔，可以揀性別揀幾多個，對於一眾擔心自己分身家分得少既富豪，可算係快人一步理想達到：用錢解決得到既問題就唔係問題，一眨眼就帶三個男丁番黎，你生到肚皮壞都未有男丁一個，呢舖真係完全技術性擊倒。

果三位小朋友完全由爸爸主理，免卻與另一半因為小朋友讀書等等問題爭拗，不過最重要係：唔駛擔心有乜野離婚之類手尾跟。無離婚問題，唔駛拗撫養權，唔駛分身家，煩少好多野架！

又或者咁睇：部份富豪二代根本唔想結婚只想玩女玩下去，於是若果晨咁早生番幾件等父母長輩之類無野好講又有孫湊，自己就可以繼續蘼爛頹廢玩落去，你話幾快樂？

父愛？盡父親責任？佢地邊識架！因為佢地自己老豆都無乜父愛俾佢地架啦。

所以，若果有邊位富豪二代希望效法，就要快快手喇。否則，到時老頭子改左遺囑講到明人造人不能分身家，你就真係生得太遲喇。