一頭煙的燒魂一

發財要立品：早前參加飲食天王的有獎遊戲，贏獲餐飲券，而我選了位於尖沙咀的燒魂一，上星期用作跟一好友餞行，吃的是他們的日式燒烤放題，二三八兩個半小時任食。

首先他們所指的兩個半小時實在有取巧之嫌：我們吃八點十五分那場，所有人迫在餐廳外等安排入內，至少蝕了五分鐘；放心，五分鐘當豪俾佢，不過竟然九時四十五分就Last Order，即是實質有幾多時間食，你自己計喇，係，佢一定俾佢坐足兩個半鐘架。

與朋友被安排坐一個靠窗位置，真的不俗－－特別是看見走廊對面一對情侶，那桌子的燒烤爐壞了，竟然放上一個火鍋用的手提石油氣爐再放上燒烤板加金屬網，俾我仲唔反檯？

不如講食物啦！選擇多，首先講講壽司刺身類：壽司有三文吞拿八爪玉子墨魚金鯛帶子，仲有蟹子及海膽軍艦，另外仲有好幾款手卷，與及蔥花拖羅等三款卷物；刺身呢？三文劍魚腩吞拿墨魚八爪鮑片紫烏貝金鯛，另外有兩款沙律包括蟹籽沙律，咁多款，不如睇相啦：

質素係唔錯既！當然唔係超靚料，但食得出唔係是是但但，而且份量夠大，唔會孤孤寒寒，你睇呢個蟹籽沙律，真係好大兜！不過千祈唔好叫一樣叫「朝鮮八爪魚」既小品，唔好食既。

牛魔王最關心當然係牛！有黑毛和牛卷、特上牛里脊肉、安格斯一口牛、USDA Prime牛肉金菇卷、美國和牛舌、牛裡肌、白乳牛仔胸腹肉，澳洲和牛百花肉。好Complicated呀可？睇相先講落去啦！

我其實唔知邊樣打邊樣，不過牛係靚既，要彈既係牛舌切得太厚好難燒。

唔食牛既朋友有乜選擇？香草羊鞍、法式羊西冷、極上黑豚肉，鹿兒島赤豚菲力肉，海鮮有花竹大蝦，果日無帆立貝轉左大大隻翡翠螺，其他仲有日本小玉貝（即係蜆啦），烏賊鬚（即係魷魚鬚啦），多春魚秋刀魚等等；蔬果類一定要提菠蘿，鮮冬菇與及雞脾菇，仲有車厘茄等等。

絕對比好多香港燒烤既食物質素高好多，企企理理，蝦真係好鬼大隻，算唔錯架！

熟食，驚喜仲大：我地已經無樣樣試，先講天婦羅，真係好唔錯，弊在無天婦羅汁附上！必定要提係日式蟹粥，鬼咁大碗又好鬼好食架！

天婦羅與及炸廣島蠔炸漿都夠薄，蟹粥真係痴線，無諗過食呢類自助餐有咁好食。

不如又講講佢有乜調味料啦！

以上呢碟，再要要收你錢架！不過每檯都有一樽海鹽，佢又會用廣播教大家點燒：海鮮放中間肉類放旁邊之類啦，不過，火勢太猛難以控制，現場抽氣極差，一邊食一邊一成身油煙味，呢個唔多好囉。除以上問題外，侍應態度尚可不過唔夠人招待咁多客。

想試試既朋友，不妨食最後果節消夜，平幾十，食物一樣，成班朋友去就仲開心啦。不過希望此店改善通風與及抽油煙。