驚喜的順德漁鮮酒家

中午跟大學同學們食飯，能夠約到而且有幾個家庭拖男帶女出現已屬難事，最終有十大兩細一手抱嬰兒到場，而攪手很妥善的訂了檯，銅鑼灣的順德漁鮮酒家。

此店入口不易找，不過上樓的樓梯貼滿了剪報，又有特首又有未來大熱門又有蔡San總之星光熠熠。我知道攪手其實沒有吃過，所以沒有什麼期望。看過餐牌，知道這裡應該主打順德菜，而攪手亦非常有心的做了Research，所以我們點了幾道特色菜：

煎藕餅，不油膩而且味道清新，很原汁原味，特別吃到馬蹄，而且例牌都有十大件，抵食又好食。

呢個名菜係大良炒鮮奶，首先同樣地大碟，另外炒得出色，無水汪汪，味道偏淡，不過鮮，而且當中有蝦仁，還舖滿炸乾貝絲，撈飯食一流，還不油膩！

唔好意思Out-Focused，煎釀三寶，咪以為普通貨色，大碟唔在講，件件都整得好唔錯，我特別食左幾條釀尖椒，辣得黎好味，鯪魚肉夠鮮香，出色！

呢味要介紹喇！名為順德污糟雞，半隻，點菜果陣會問你要走地定係雪雞，我地叫雪雞。翻查資料，此菜用紅棗燒酒大頭菜蒸，加上芽菜蔥花，難得蒸得嫩而且好香，我食得出紅棗味與酒香，唯一並不太適合小朋友食就係有碎骨，不過真係好唔錯。

除左呢四個菜，我地點左大量點心，印象中有兩籠包，兩籠鴨腳扎，兩籠蒸鯪魚球，一籠牛柏葉，一碟煎鯪魚餅，一碟煎腸粉，一碟牛腸一碟蝦腸。應該唔止，而以上點心大致上俾我地印象係唔錯，我食飽之後無乜味精警號－－係，我近年對於味精敏感度提高，好愁。

好喇，佢地俾左間房我地，仲有電視睇，開左兩壺茶一壺水，你地估埋單幾多錢？六百二十五蚊，平到你唔信。

此店呢次俾我印象好唔錯，係值得搵舖約班蝗蟲村村民去試試的。