戀殖英倫：Kimpton Fitzroy London Hotel

作為一位成長期都在英國殖民統治下成長既人，同好多你地都一樣，唔知典解對英國有份情意結。終於，早幾個星期，因為出差，人生第一次踏足英國，仲要係倫敦。

興奮難免，不過實質遊玩時間不多，工務極之繁忙。但我都爭取時間四圍行，除左足多幾隻歐洲限定Pokemon之外，實在身處倫敦，果份親切感，非筆墨能形容。今次先講酒店，其實公司對小弟都唔錯，今次入住既Kimpton Fitzroy London Hotel，係值得我介紹一下。

外觀係咪好得？係架，入面裝修都非常之咁有型同有品味，睇睇：

 

酒店對住Russell Square，背住地鐵站，交通的確方便，而且四周環境好舒服。不過大家都估到，此建築物都有番咁上下歷史，改建而成酒店，一定有唔方便既地方。酒店房預左細（朋友們一早講過我知），一層有幾十間房，一條環形走廊到達升降機，我間房行去升降機都有段距離，與及唔知典解，走廊沿途有一兩級樓梯，唔多方便。

 

　

酒店每日都有兩支水一支奶提供（與及靚英國茶包及兩包爆谷一排朱古力），奶我最後嘗試開黎飲，唔得，太新鮮果隻我唔得。而我間房望出去都好開揚。

酒店房講完，餐廳酒吧有三間：先介紹我某晚食晚餐既Neptune。根據Tripadvisor係幾高分既，結果呢？

 

鍾意個裝修，而呢六隻分別係Jersey Royal No.2，Carlingford Loch No.3及Lindisfarne No.3，十八磅六隻，唔貴，而且幾好食。好喇，伏位出現：Beef Tartare，根據Menu，正常形容，無講係咁fusion：

 

侍應端上呢個木兜果陣上面係有塊脆片脆片上應該有ｄ菇，我都未望清楚（都莫講話影相）佢已經出手係咁摏摏摏，而味道，我覺得自己食緊廚餘。

 

呢件係36-day-aged Rib eye, 250g Swaledale Farm Wood Grill Steak，再點個薯蓉，個扒少少熟過medium rare但係幾唔錯既。

餐廳有一間Coffee Shop叫Burr & Co.，我有一朝幫襯過：

 

呢邊裝修我更喜歡，的確係可以扮文青又或者點杯咖啡慢慢做下野。

個早餐係咁既：我唔知到原來個奄列都有咁多配菜，又驚唔飽啦，咁點左個豬肉腸同雜菌，結果當然飽到咩咁啦！

最後介紹酒店有間好型既酒吧，Fitz's Bar：

 

啤酒絕對唔平，但味道新奇有趣，至於Snacks真係超得，我仲食唔到有ｄ熱賣野，若果下次去，再食！

之後再介紹倫敦有乜睇有乜食。