終於吃過書湘門第

有時屋企附近有好餐廳，唔係唔想試，但一條友的確比較難去試。於是，聽朋友話，好好食喎，米芝蓮喎（呢個未必一定可靠），咁近你都未食過？咁又真係未丫嘛。

書湘門第呢間擺到明食辣，非常開正我果瓣，不過要搵朋友黎呢邊食又未必有人應我機。終於，前排搵到食辣朋友一齊試試，一邊食，一邊異口同聲話：下次搵多幾個人黎食，咁多野想試！

位於水街附近既書湘門第係做湖南菜，都開左業好多年，一直見佢好好生意，旁邊果間京香餃又係無得頂，呢期又係大熱添，咁你地知位置係邊啦。

舖頭位置唔多，我又見到有一條友黎食，今次同朋友完全唔理會份量，點左四個菜：

首先當然要介紹最搶眼既水煮牛啦！份量大，料又多，牛肉都上左生粉所以特別嫩滑，而且辣度十足，仲有芽菜同綠豆粉，真係一吃停唔到口！

 

之後要介紹酸辣藕尖，即係蓮藕苗。呢種酸辣非常醒胃，而且此店有樣野係要讚，就係唔會所以食物都同一款辣，係有分別。唔好睇少呢碟，辣度都有番咁上下。

青椒燜豬肚係全晚最mild一道菜，基本上似豬肚湯，湯非常好飲，豬肚爽，不過特色就欠奉喇。

剩低呢碟，本人極極極推介：涼瓜炒臘肥腸！臘肉食得多，第一次食風乾臘肥腸，油膩度減低而且有咬口，但臘製香味好得，加埋苦瓜一齊炒，我朋友麻麻地苦瓜都話好好食，係呀，年紀大左，識欣賞苦瓜丫嘛！

咁食完辣，順便介紹你地行上第三街食甜品！以前甜品堂轉手變左呢間松屋，第一次去食，咦？得播！

朋友選左日本蕨餅因為佢好愛，佢一試都話，喂，掂播！我都食左件，果然質素好唔錯！而我點乜？我完全覺得無得輸呀！

北海道牛奶梳乎厘配雲哩拿雪糕！值得等一等，一上檯，好香，然後一試，輕得黎又清甜又有奶味，雪糕都好好食，呢個真係一定要Encore！

各位朋友過開黎搵我食飯，呢兩個選擇係咪好唔錯先？