我雖則人緣一般不過一直跟部份中小學同學有聯絡，而類似飯聚通常又會叫我選吃的地方。前陣子又有海外同學回港放假，大家當然要約出來吃個飯見個面啦！
去年，我們十幾人在蓮香樓吃得很高興，今年，蓮香樓沒有夜市，而我們亦不想重覆。於是有人提到不如去石塘咀熟食市場，畢竟那裡也是我們聖記仔常去的地點之一，當年跟神父也會在那裡吃晚飯的。不過，太久沒去，應該去哪一間呢？我就問問中學師兄，他叫我去成發海鮮小廚，因為老細之一都係師兄，然後，What's app聯絡了師兄強哥訂了位，當晚早到的同學就被問：「係咪聖記仔訂檯呀？」
首先要注意，我們並沒有折頭，不過當晚碟碟都幾好食，而且回憶番晒黎（包括大學啦，我在面書一貼，一班港大同學們表示非常懷念），一大班人的確可以再去食過！
蒜蓉蒸開邊蝦，賣相已經靚仔，至鍾意好多好多好多蒜蓉，而且蒸得剛剛好，所以轉個頭就食晒，然後要求留碟，蒜蓉汁撈飯丫嘛。
此乃同學再點的墨魚餅，彈牙，仲要有墨魚粒，有咬口，大大件，食過好多唔同舖頭相同產品，呢家排名好高！
我班同學仔好有型既，有人要求要食炸雲吞，又有人話要食咖喱角，於是問問有冇雙拼啦，又有播！我就淨係食到咖喱角（炸雲吞俾人搶晒），脆口又香，送啤酒一流。
椒鹽白飯魚，我有少少懷疑係咪因為我地係師弟所以咁大碟，有眼見啦，好飽滿，而且香口惹味。
咸菜胡椒豬肚湯，好飲囉，料又足又份量足！
呢個麻辣芽菜豬大腸又係驚喜！成發都有幾多辣野食，呢個我地後期先點，好食到想再叫！
水煮牛，雖不及川菜館，但都非常之唔錯，牛肉夠多夠嫩滑。
金銀蛋油墨菜，邊有咁鬼多肉碎架！好味又抵食囉！
釀尖椒，呢碟又係好野，件件都非常咁飽滿，又有適度辣勁！
全晚至貴呢兩隻蟹，我就見喜愛拆蟹既同學們個個係咁掃。
仲有呢碟，相都未影已經被同學們動手既煲仔飯，係咁架，後生十年放低碟食物想影仲難呀！
呢晚實在食得好開心，有同學話有時會上黎食晏，碟頭飯抵到爛。師兄就話夏天鬼咁熱晏晝就咪黎啦！
下次再搵班同學去食去懷緬一下先。
沒有留言:
發佈留言