生日豪吃在Robatayaki

生日當日，有朋友請我食左餐爐端燒，仲要係任食果隻。位於紅磡既Robatayaki，連續三年被車呔人加持，我就從來未食過。

原來逢星期六日及公眾假期午市，有呢個叫「相撲手午餐」，成人收費為HK$478再加一，可以食足兩粒鐘。朋友表示一定要訂位仲要早果隻，一夠鐘，就會招呼你入座，可以睇住師傅點樣炮製美食。

 

有咩食呢？睇左餐牌先：

好喇，首先話俾大家知，關於燒物，通通慢工出世貨，而餐廳內有三個爐位，每位師傅負責製作不同食物。一黎到，想食，當然點刺身壽司之類啦！

 

雖然爐端燒餐廳主打一定唔係呢Ｄ，不過呢個價位五星級酒店餐廳，點會差呢？所以係幾唔錯既。

點解無端端有清酒煮鮑魚呢？廚師推介，人人有份。嗯，好得架！

我就睇住師傅炮製銀鱈魚及鰻魚又點會唔叫呢？等待期間一邊睇住實在口水流晒，係好好食既！

 

海鮮類真係無得輸，蝦勁大隻非常彈牙，連個蝦頭都趙得；蟹腳，鮮甜啦，一拉就成條肉，點會唔開心先。

 

明太子雞翼係唔能夠唔點既！香口又塞住滿滿明太子，你話點可能唔食！

 

蔬菜類，露筍青椒係必點，菇都好食，仲有唔記得影既秋葵！

 

重點黎喇：牛肋骨係好食既，羊架極掂，不過和牛網燒呢，係有少少失望既，明顯係Order太多師傅控制火喉出問題，有ｄ浪費。朋友係附近番工，就話佢地平日食午餐，和牛網燒係好食過呢個好多。不過唔緊要啦，大致上都非常美味，仲有甜品，同埋每人包一杯飲品。

我覺得若果大事慶祝黎呢度豪一餐係值既，畢竟呢個價錢，有時去酒店食自助餐，水準一般仲要同人爭餐死！