十一月初又出遊首爾工作，十一月初首爾天氣非常好，紅葉黃葉都有，而且不太冷。咁我實在係黎做野，睇風景就無我份喇，食呢，都仲有好唔錯既。
由於對於食，除左有Ｄ覺得放唔得入口過唔到自己果關，好多未食過我都敢試，當然中伏會有，但有時飲食經歷真係要有，你先知係乜野一回事。
是次第一餐，到達後Checked-in，麻煩酒店員工幫我打去問有無得食，然後就出發。呢間，係一位成日去韓國既舊同事介紹，表示此店係非常地道，海鮮好新鮮，刺身好得咁話。
由於我唔識打韓文啦，餐廳係呢間，明堂劇院三分鐘路程：
上樓，入到去就係韓劇打工仔放左工去食飯果類餐廳順便劈酒果隻：
唔識韓文，英文溝通不能，唔駛驚！國語係可以的。不過要提醒，此餐廳真係淨係得魚同海鮮食。咁本人除左叫左個刺身拌飯之外，就點左個八爪魚刺身喇。其實回一回帶，我
兩年前食過既：
當時都係話上到檯仲識郁，不過因為切得好細，所以係好食既。今次呢，嗯，震撼到不得了：
餐廳地道嘛，切都切得好豪邁，所以，有部份都幾大條。大條既定義，熟左，你食無問題，問題係未熟，佢仲識郁架播：
呢條片係岩岩上檯果陣，是咁的，我用筷子嘗試去夾，佢捲住我筷子，我立即唔夾果條，選擇細粒既黎食。放入口，我開始諗起，有韓國人食生八爪魚因為被吸盤吸住喉嚨窒息死，所以每放一件入口，我就死命咁咬咬咬咬。
食左兩年，我決定放佢埋一邊先，食下個刺身拌飯：
先講講，是真的，配菜小碟多到你唔食而且好好食，至於呢個刺身拌飯，都係一貫韓國刺身，切得好厚身，於是，又係要咬咬咬好耐。係新鮮既，撈埋辣醬乜乜乜黎食，唔錯，但我諗我都係鍾意食日式多Ｄ。
至於後面條烤魚，我係唔知有跟既。有少少苦，又有少少腥，好多骨，我唔係好岩食。
好喇，十五分鐘過後，親愛既八爪魚點樣樣呢？
仲！係！咁！生！猛！
我結果食左四份三，老老實實，驚嚇多於享受！我之後將相關影片與我來自歐洲同事分享，佢既面色變晒，問我點解咁勇敢，然後叫我開心Share俾佢，佢又Share俾其他同事。
至於韓國同事表示，呢種唔係最驚，最驚係食細隻八爪魚唔切就咁隊，死左人，都係呢種食法。
其實當日完全呢餐，我番酒店做野，夜少少去食晚餐，都決定搵番間穩穩陣陣
上年食過既：
係囉，所以，第一日既總結係大開眼界，我又可以多樣野同人講，但千祈唔好俾阿媽知，實鬧。
沒有留言:
發佈留言