（你知啦去台北咁多次諗題目都開始有難度）四個同學仔咪係四仔旅行團囉，無錯，滿足同學們願望，在食這方面我當然盡量不能讓佢地失望啦！再加上兩年次食過盡量唔再食（早餐另計），仲要幾日都係台北，真係有難度架！
不過被朋友稱為台北旅遊教練我又典可以放棄呢？呢幾日，主餐無重覆款式，大部份都得到團友們滿意，咁不如慢慢介紹過你地知啦。
台北食串燒，並不是較為台式果款，而係類似日本居酒屋，其實選擇都好多。今次食呢間東京串門子，其實我早幾年前食過亦介紹過，當時用既篇幅就唔多既，而且仲係一人前，食得幾多丫！今次三個人，於是雖然係星期四晚，我都乖乖用面書與店家聯絡訂位（是的，我之後都會講我點樣訂檯），所以，八點幾到達，差不多滿，好彩有訂就唔駛坐舖外食塵喇。
不如先睇睇餐牌啦！比起我幾年前，選擇多好多囉！
本人非常均真，我地點左幾款炸物，不差，但不驚喜，所以都介紹你地睇睇：
酥炸雞軟骨，炸粉多左少少，調味係好既；蟹醬Wasabi花枝丸，一百台幣三粒，呢個價錢就欠驚喜喇！香柚風味酥炸雞皮，都係炸得勁得滯，欠缺炸雞皮應有質感，雖然個柚子汁幾唔錯。
入正題喇，此店，串燒係無！得！輸！仲要你望望個價錢，真係CP值超高！
以上有四款雞串：鹽蔥、海鹽、孜然、明太子。首先，雞實在嫩滑Juicy，所以，其實最基本海鹽經已好好味！不過此店鹽蔥又不能不吃，不油膩，你係唔會捨得放棄任何一粒蔥！孜然相對不咁驚喜，至於明太子，我揀得就因為我食過知道有幾邪惡啦！
孜然的確係配羊最好食，所以，孜然羊肉串，真係好想encore，不過因為我地實在點得太盡興，所以小吃多滋味！同樣火喉掌握得好好，肉質絕對不柴，孜然羊肉，邊會唔好食丫！
牛舌配鹽蔥都係好出色既，唯一今次差少少就係上菜時已經無咁熱。
此店五花腩亦極之出色，所以千祈唔好唔點豬！海鹽、鹽蔥、孜然都各具特色，當祭你望望餐牌，其實仲有好多花款俾你試！
牛又典可以唔叫呢！此店都用美國無骨牛小排，四十蚊唔駛港紙一串，多汁到不得了，完全無筋，又的確好難唔介紹你地食！店家後來幫我地揀左一款叫醬燒潮吹頂級牛排都好唔錯，不過我都係推介你地食串燒！
名古屋鹽烤雞翼又係得，我係雞翼迷，呢個好高分架！
呢個只要三十蚊港紙既芝士明太子玉子燒非常花心機而且好食，齋隊串燒可能唔夠飽，呢個就好唔錯，當中仲有粟米粒！
至於海鮮，同學點左呢個魚下巴，烤左好耐先上菜。果陣其實佢好飽，但佢結果食晒，話佢烤得好唔錯。另外點左個帶子串，水準ＯＫ不驚喜。
此店酒類選擇都唔少，我地之前飲果個檸檬啤酒好得，然後我揀左柚子真露，配串燒當然要飲酒啦！
無論一條友或者幾個朋友，此店的確係好唔錯既選擇，但請記住，訂位，同埋人地星期日係唔開既！
沒有留言:
發佈留言