去台灣，無麻辣火鍋的確並不完美。於是，儲埋儲埋一堆餐廳，又有機會向好識食朋友問問。佢建議我去邊間之餘提到：「好多台灣朋友叫我試肉多多，話呢個集團係肉商，所以肉好靚，而且非常抵食。」好識食朋友通常都好識食，所以既然有呢個建議，我就即管一試。
此店有好幾間分店，有一人一鍋，亦有一大鍋幾個人食。朋友話去古亭旗鑑店，由於網上無訂座，所以要麻煩台灣朋友幫忙訂位，另外請留意：此店不收信用卡，現金要帶夠。
首先睇睇主要Menu：
先選湯底，然後選肉款，肉類都會附菜盤，再選白飯／豬油拌飯／烏龍麵／冬粉／王子麵等等，仲可以選多樣菜／活菌豬／小肥牛或單點海鮮。若果想再點肉咩？以下價錢減一百台仔就係單點價。叫呢個套餐，出面所有飲品甜品醬料任你用任你飲。
單點Menu就咁，都唔貴；另外有幾款大肉盤／海鮮套餐。
四條友，埋單係唔駛二千六台仔，即係六百五港紙。大家食到攬住個肚：
湯底我地選左四款啦：牛奶鍋，藥膳，蕃茄與及特選麻辣。麻辣湯底要加辣，加完就好岩數，越食越麻，鴨血豆腐可以再添，其餘湯底質素不俗，特別以藥膳及牛奶鍋為驚喜。
咁喇，有圖有真相，望望肉盤如何：
我地點左：極佳級霜降牛、美國安格斯厚切牛小排、噶瑪蘭盤克夏優選豚、紐西蘭小羔羊嫩肩；另外打卡又有多碟牛送，跟餐又有牛同豬送，你唔好問我邊盤打邊盤，總之，無論點既定送既，質素都非常高，有圖有真相，肉商既肉真係堅靚仔，份量絕對唔會欺場，食肉獸們絕對勁滿足。
菜盤就唔止菜（此乃四人份），仲有魚蛋卷蟹柳燕餃等等。
四份餐除左一份牛一份豬，另外我地點左青口同小卷，好具水準，特別係小巷。
我地另外點左呢個三寶，我可以講係單點質素非常高：我食過無老窩與及鼎王，同類都係雪到實一實！
好喇，飲品好多好多好多，茶啡汽水果汁啤酒沙冰（特別沙冰）樣樣有，雪糕有驚喜，除左有大品牌，另外有泰國品牌雪糕，椰子雪糕勁好食，仲有唔係人見人愛既榴槤雪糕！另外仲有糖水咁咁咁。
要一讚係店員服務好好，有水準有速度，佢地每個都被改成其中一款恐龍名字，所以我地走果陣填問卷要讚佢地都要寫乜乜龍。
呢間真係無乜遊客，本地人居多，所以你唔會聽到廣東話或者大叫「苦烏樣」既人，呢樣，絕對係賣點啦！
沒有留言:
發佈留言