三十過後一個人住: 台北四仔旅行團：牛肉麵牛肉麵牛肉麵

2018年8月24日星期五

台北四仔旅行團：牛肉麵牛肉麵牛肉麵

由於有團友非非非非非常喜歡食牛肉麵，接近日日食甚至未出發連香港台式牛肉麵都唔放過。於是，我又點能夠唔安排食牛肉麵呢？

正因為呢班團友真係好痴線，短短幾日行程，我地去左三間牛肉麵店。就算入到去只隊牛肉湯唔食麵（邊有咁多Quota食丫老老實實），呢三間，應該對香港朋友唔陌生，因為，被車呔人看上了。

牛店

西門町牛店我諗大家都聽我介紹過又或者去過，因為香港人又典會唔識西門町呢？所以，此店特別多遊客，但食過咁多次，質素維持，水準無乜跌。此店出名乜呢？精燉牛肉，用上加拿大牛，料靚，湯清甜高質。

首先介紹我地每人黎一碗既精燉牛肉湯先：

完全無味精，少油（你自己可以加佢既牛油），原味已經好食，加佢辣醬又有另一種Feel，不過真係幾勁，唔好亂黎。有牛腱肉牛筋牛肚各二，樣樣都處理得好妥當，無走樣！

此店必點小食，牛腸！你見佢咁好心機將牛腸去肥捲成咁去鹵，有咬口又入味唔肥膩，多多都食得晒！

林東芳
原來上一次去已經好幾年前，仲係好細間好細間舊舖，夜一夜去食，果種美味依然記得。今次去新舖，就算係巷弄內，林東芳呢個朵一樣大把人知，九點幾十幾到達，同樣要排隊，不過好快就可以入座。新店裝修實在舒服好多，仲有寫到明只此一家別無分店。

半筋半肉麵就係指定動作！林東芳湯頭有中藥成份，與牛店精燉不一樣，但調得好好，雖然有加味精，但整體依然好高分！

麵係好好食，彈牙粗身好有質感；牛筋牛腩一咬即化開，配上好多蔥花，名不虛傳，而且唔貴。

小食，鹵花干真係必點，入晒味；至於牛腸，牛店好過佢，呢個凍而且硬硬地。

建宏牛肉麵
都係西門町既建宏牛肉麵同樣被米芝蓮選中，開廿四小時平到爆但水準好唔錯仲一路有人幫襯。我係第一次食，仲係一朝早（班痴線食完早餐話要再食），舖頭大大間好光猛，不過根據前一晚發神經一條友去食既同學話，此店侍應好有性格，點左野，然後佢會送上，請自動付款。