其實除非出差，否則去台北我唔多恨酒店有早餐提供，因為台北早餐店選擇多好西更多！今次除左encore西門町豆漿與及麥町吐司工房之外，團長帶團員去兩家自己都未食過既早餐店！
要用一篇文章黎介紹當然係好野，不過請記住，早餐店唔會開得晏，部分產品賣完即止，想食真係不能睡太久。
首先介紹西門町紅樓後金花炭烤吐司！我記低好耐但從未食過，今次第一朝去食，最後果日（星期一）想帶後join同學去，典知星期一唔開！所以果位同學只有飲恨的份兒。不過下次自己去囉，我都係第一次去之嘛。
餐牌好容易睇又畫得靚，咁點完呢，自己搵個位坐，陣間就會送黎俾你架喇！
同學仔叫左呢個唔知乜乜辛口豬，少辣既，豐盛程度都唔駛我典介紹喇，佢話好食既。
我同另一同學點呢Ｄ邪惡組合啦！右手邊同學點果個叫「給我壁咚」，淨係見芝士咁溶出黎真係會加線，我果個係期間限定東東，唔好意思唔記得左名，粟米雞蛋豬排都有芝士既，總之呢兩份真係會食到你非常狼狽，所以，佢地有膠手套提供。
有關飲品，我地就好乖乖咁點左，無乜特別既紅茶，典知飲飲下，有位美媚囉住Ｄ杯仔俾我地試飲，原來過兩間店有佢地聯營既「慢慢喝金花」，標榜天然茶不加人工香精，因為試飲果杯實在好，所以我同同學之後都飲左杯青檸玉露，清甜天然，配上三文治非常好。
然後介紹另一間，位於中山區巷弄當中，餐店叫可蜜達Comida，我典識架呢，咪又係睇台灣飲食節目見佢介紹過就記低啦！
據聞此店係上班族至愛，所以我地星期日去都仲坐左咁多人有ｄ意外。記得跟人規矩點完乖乖坐低就得啦。
呢間選擇簡單少少，不過同樣係邪惡既，睇睇：
上一回點辛口乜乜果位同學口味比較特別，今次佢點呢個可可起司蛋吐司，朱古力醬加豬加蛋，佢話唔係唔好食不過唔慣，我就唔會試喇。
我呢個，只可堂食不可外賣，芝士肉蛋雙重奏！係架，黎到就係咁架喇ｄ蛋汁，好得人驚架，一咬落去，嘩，廿蚊港紙香港依家只食到件無乜料既蛋牛治咋頂你！
好喇，果份咁勁既唔係我，芝士豬肉滑蛋四重奏，都係店內限定！見到就覺得，嘩，之後仲駛食野既？而個幾鐘後，我地去左食京鼎樓。同學係咁話我，邪惡呀，朝早離開酒店已經食左野，依家又食，晏ｄ又食，無野下話。
呢兩間真係好野，大家去台北，自己搵搵喇！
同場加映：話說有日經過北門站，見到有部機，可以買蛋糕，仲係我最最最愛既北海道牛乳捲蛋！於是有一晚就去左買喇！大家想知邊個捷運站有呢部機可以睇
呢度。部機有三種可買，而我買既就係亞尼克生乳捲(原味)，NTD380，咁你可以上網買左去囉貨，或者好似我咁，行過想買，就用優悠卡買（佢話信用卡得，但我失敗左）。咁整完之後，佢會咁出黎：
好玩架播，影住佢件蛋糕典出黎。咁實際係典樣呢？
喂堅好食，幾位同學都話正，內裡既Cream又香又滑又唔會好甜，有同學仲想臨走買番件帶番香港不過趕唔切！去台灣有機會買黎食下喇喂。
沒有留言:
發佈留言