我喜歡唱歌，也有時常唱K的那些年。有些歌手你以為我會常唱的，那麼你應該不是愛唱K的人，因為愛唱K的，又唱得不錯的，總喜歡唱一些不是人人聽過的，有時是在跟一班朋友的場合唱，總有希望可以告訴他們：「喂呢首你未聽過其實幾好聽。」的推介心態，當然，有時一個人唱K，也可以好好滿足自己唱心頭好的願望。
鄧健泓成為歌手是2001年，我一直覺得他的聲線是容易認的，而他出道的首張唱片，正確點來說，他的首兩支派台歌，的確先聲奪人，對於我們這種喜歡挑戰自己的唱K精，是非常深印象的，因為，要唱到這兩首歌，的確不容易。
如果有神的出現，的確讓很多人驚訝：這個曾經是兒童節目主持的原來唱得那麼好！而我們喜歡這歌的挑戰位，當然是第二段Chorus的高八度部份了！相信唱片公司對他非常有信心，而亦相信他有實力，亦得到前輩賞識，因為，第一張唱片未出，派了兩首歌，竟然被安排去學友的2001年拉闊當嘉賓，跟學友合唱
如果有神及
馬路英雄（其實還有獨唱
直上不過好像vcd沒有收錄），你看看他當時的表現（28分9秒左右）：
又或者，可以睇睇呢個上（當年仲好難上）的勁歌季選現場版：
當然不能不提
直上！改Love Psychedelico的這一首，我可以話落K非常鍾意唱，因為，Chorus果幾句非常密而且好難搵抖氣位的歌詞是非常好玩的（黃偉文先生的作品）：
首張唱片還有伍樂城加林夕炮製的
衛斯理之戀，雖然當年並非我最喜歡的，但唔知點解聽番又識跟住唱架播。
由於第一張唱片反應好好，唔夠一年就推出第二張唱片，大熱當然要數呢首啦：
當年未興「收兵」不過當兵呢個行為一直存在，所以，呢首亦係一眾當年既兵非常喜歡既作品，因為實在唱盡佢地既心聲喇！咁當然又不能不數另一首大熱
心寒啦！都係同一系列作品，開始認清果位所謂女友既真面目！獨唱版當然受歡迎，後來食住上找來鄭中基合唱版更正，兄弟訴苦水，非常合用：
（以為我無呢隻歌原來屋企有伍樂城作品集收錄左）
（係呀我第一次聽
高山低谷真係諗起呢首架）
仲有一首我非常喜歡，佢其實都有唱開心甜蜜小品，例如呢首當年馮翰銘作俾佢既
大男孩，三拍子如同坐上旋轉木馬般快樂的童話作品，仲搵黎北京愛樂樂團伴奏，真係好好聽架！
介紹完呢首一定要介紹下集，下一張唱片出現都係Alex Fung既作品，同樣童話feel同樣甜到不得了既
小矮人，填詞就由林夕換上林若寧，我都肯定有係K唱過！
第三張唱片《好。戇男》，我好鍾意首隻派台既
好，可惜當時派台反應唔算好，林夕份詞非常到肉，失戀被棄慘歌，未聽過聽下，的確有血有淚。（呢個MV版事究竟係咪當事人落Ｋ唱再錄架呢？好現場感播！）
唔可以數漏都係伍樂城作品
戇男，當年佢的確係兵仔代言人，這首繼續走此路線，林夕又可以寫出果種真係又蠢又戇的兵仔心態，非常多人喜歡落K唱呢隻架！唱片收錄Hidden Track弦樂版都好聽，就無原版咁有feel囉！
不過此碟苦情歌當中我最愛一定係繼續都係林夕寫Eric Kwok曲的
豬骨湯麵，好慘，非常慘，簡單講就係條女嫌自己無出色唔想同你捱苦走左去，林夕果期係咪失戀呀？呢首成首詞好有情境，悲到不得了！
第四張碟《新居入伙》係一張Concept Album，有寫俾家人既
私房菜，有派過台好好聽既
一個鐘之後，有張佳添作曲的
甜蜜租約與及第一首叱吒冠軍歌
阿琴：
伍樂城當年真係寫左好多好歌俾Patrick架！
此碟反應一般，或者因為慢歌與類似作品多，又或者當年未有好好宣傳。其實之後佢都有出碟，其中2010年推出的《Link 2 Pat's Trick》其實好唔錯，我好坦白，係後來於二手店平價買番黎，不過有時好歌唔一定有好報，聽開歌既都知道。
好喇，其實佢好多作品我都仲識唱，所以，黎緊4月29日麥花臣演唱會，我買左飛喇！
沒有留言:
發佈留言