2012年12月23日星期日

非粉絲看吸血新世紀4之破曉傳奇2

去年,陪朋友進場看了上一集,我睡了大半場。可想而知我不是粉絲,而且完全不明白有什麼好看。這一集,朋友表示有優先場的票,我其實見食完飯得閒又再一次入場。

哈,或者個天見我今次又為陪朋友,呢個大結局,我完全無訓過,而且無乜冷場,可以播!




故事上期講到,女主角Bella唔知生定死誕下女兒,咁此集一開始就話你知,男女主角一家三口健在,Bella當然變成殭屍,而果位只賣身材既狼人就唔知點樣同佢地個女有左印記。Bella變身之後力大無窮而且非常超班地能夠對住人類忍住唔發狂吸血,咁,前段大致講佢變身後而且要係老豆面前扮仲係人既情況,好小品,亦有少少Hae。

之後呢,因為有人報寸話男主角同個人類誕下下一代,可能係不死童,會令到殭屍家族好大鑊,於是,老大準備對男女主角小女兒開刀,而男女主角收到風,就四處向其他殭屍證明女兒並非不死童,本來打算搵證人,結果就係吹雞準備對戰。

搵不同地方殭屍過程,原來不同種族都身懷絕技,果刻開始,覺得套戲似X-Men喇。咁,重點當然係有冇正邪兩方對打呢?

答案係,Yes and No。不過打鬥戲係非常緊張刺激好睇,節奏明快而且夠狠,嗯,亦因此唔明白,點解有父母帶十歲樓下小朋友進場睇,就算唔講呢類片段,男女主角纏綿片段都兒童不宜。

作為非粉絲,我入場睇左一套娛樂片,有笑有緊張有大場面有打鬥,絕對收貨。至於你話幾位主角,恕我直言,我真係唔覺男主角有幾靚仔,我知女主角之前因為偷食同男主角散過又復合,女主角戲中表現反而俾到我印象。不過最深印象係女兒非常可愛標緻。

我知道係最終章,不過其實想拍續集都唔係唔得,畢竟開另一條殭屍變種特攻相信都有人捧場。

你係粉絲?咁我唔知點解你浪費時間睇我呢篇文喇。

沒有留言:

發佈留言