喪食東京遊之麵麵麵（下）

拉麵者，想知有幾多花款，自自然然諗住要去拉麵博物館。位於橫濱拉麵博物館，並不易搵，外表亦不起眼，入場之後地下似超市多過似博物館－－介紹拉麵史與及相關東東的部份，著實略嫌簡單兼沒趣，當然，你想買很多跟拉麵有關的東西或者買個拉麵番屋企整，呢度絕對不缺。

不過，好玩的地方在B1與B2：一整個懷舊日本街景，當中有好多間不同地方拉麵店，有得睇有得食。
現場人山人海，因為唔同拉麵館都有不同朋友支持，乖乖排隊等食。咁，我幫襯左邊間呢？

和歌山中華拉麵，唔錯，因為有我至愛既筍，但，都係一蘭好食好多。

仲有好多懷舊野，唔止拉麵，俾幾張大家睇下：

最後呢張，著實幾驚。

麵麵麵得ｄ咁既野？唔係既，俾呢個大家：古奈屋！！！最後一日最後一餐於池袋東武樓上，為是次旅程標個尾會：因為，呢度既咖喱烏冬，真係好味到不得了！

天氣熱，我揀左呢個期間限定既夏日蔬菜冷烏冬：

估唔到估唔到咁香甜既咖喱，更估唔到咁多新鮮蔬菜加片火腿係會咁好食，烏冬好彈牙，總之成件事就係非常之咁Fresh！

呢個天婦羅炸蝦，皮薄蝦靚，值得另外Order架！

此店另外要讚就係非常細心地每位客人有一小圍裙，因為話你知，食呢個咖喱烏冬，咖喱汁好容易彈到周圍係，你唔想件衫中招，乖乖地掛好佢！

我記得金田一有次去旅行買左盒咖喱汁俾我，咦？好似係呢間播！唔怪得知咁好食啦！

此店分店不少，絕對推介，你會對烏冬完全改觀！