喪食東京遊之麵麵麵（上）

當你地期待大魚大肉下集，我又想寫其他！去日本，除左食刺身壽司，拉麵是絕不能缺的！是次旅行食拉麵烏冬都有幾餐，又點可以唔介紹呢？

上集，先介紹呢間梅開二度既拉麵店：一蘭！係我未去日本之前有朋友多次提議我去食的拉麵店，而且杜如風亦有介紹，於是，搵到池袋店位置，囉住杜如風本書，出發！

舖頭入面有廿四個位，唔駛人招呼，自己看圖識字入錢買票，然後睇見顯示燈邊度有位，一個『空』字閃出，請自己入去坐定。係，幾個人去，分開食，唔好煩。

係呀我坐一號位，點解要帶杜小姐本書呢？因為拉麵有張紙要填，包括湯濃度、麵要軟定硬，蒜片份量，辣椒份量與及蔥你要幾多要白蔥定青蔥，叉燒要唔要。我唔識日文，杜小姐本書功德無量翻譯呢張紙，你話幾重要呢！店員就係入面收完你Order預備食物，你呢？等食，又可以飲下水，要叫佢地黎收Order紙呢？按一按掣就得。

呢個蛋，你真係唔可以唔食！佢教埋你點樣剝殼，之後，落鹽，慢慢嘆！

呢個麵，任何一部份都好掂！湯係好原汁原味，麵身係幼而有蛋香，蔥不能夠少，叉燒中規中矩，辣椒粉不能不落！一邊食，一邊出汗，但好正！後面仲有紙巾提供，貼心服務！送上你既食物之後，侍應就會落簾唔阻你慢慢嘆！

你睇？湯都差唔多飲晒！

另一晚，心思思再去：

呢張紙囉！你唔識填，好蝕架！第一行係味道濃淡，第二行係湯濃淡，第三行係蒜片份量，跟住係要白蔥青蔥定唔要，然後係叉燒份量唔要定要，再之後係辣粉份量，最後係麵條硬至軟。

講下個生啤先：三百Yen好抵飲呀！Suntory播！個麵呢，今次俾多一百Yen加多幾倍蔥，爽到爆！

蛋又點可以唔叫呢？不過今次湯都飲晒，有驚喜播：

識日文既朋友，佢碗底寫乜呀？

呢間店周圍都有，仲要開廿四小時，你話幾不得了？