內地團與惡導遊

先再懷疑因為被迫購物不准離開商店而心臟病發的前國手，之後再來一單女導遊鬧爆你不購物再恐嚇你今晚無酒店住事件，好像突然間香港旅遊業形象大受打擊，然後相關人士立即跑出來回應。一切看在眼裡，事實表面上旅遊業形象的確受了打擊，但問題究竟出自哪裡呢？

別單純的像某些人只指責那位珍姐不知所謂，不妨想想她的回應：「大家都係搵食。」

首先，這類便宜得過份的旅行團，據知那些導遊要貼錢上班，若果他們帶那團能夠購物到某個數目，那筆錢才可以拿回，之後的就是他們的利潤（若有錯請指正）。那麼，他們其他不止是無底薪，而是搏一舖。

所以，在這個要搵食的大前題下，他們當然要這班團友購物啦！你可能會說：「邊個叫你帶呢類團呢？點解唔正正經經去做大旅行社導遊？」說得輕易，他們若果有那能力，早就不去接這些團來帶了！同時，部份人可能在之前香港斬這些零團費團友一頸血還未廣泛報導之時的確搵到錢，於是，容乜易有個導遊牌，入行搏一搏，都不失為一條出路。

鏡頭一轉：我們看看那班遊客。其實他們付的那個價錢能夠在香港玩幾日有食有住，的確是奇妙之旅。當然，我們明白，你參加一個旅行團，旅行團若果講到明團費幾多有食有住，這些基本的都應該有，這是合約精神，至於是否要購物，聽聞之前有些團是講到明要購物的，若果參加的團沒有指明，道理上又真的不用購物。

不過，當你支付一個完全不合理的價錢參加包食宿來港旅遊的團，然後因為沒有購物被導遊惡言相向，雖然，於理不合，但想深一層，又不是沒有原因的。

對於內地電視台將這件事大肆報導，其實是好事：我相信就算點唱，香港是購物天堂的地位在很多國內人心目中都沒有改變的，但有個重要的曲線警惕：的確無咁著數的事，俾幾舊水就可以來香港吃喝玩樂幾日，那班以為真係咁平的國內朋友，醒醒。

至於那間旅行社，出來做場大龍鳳，表示什麼永不錄用，嗯，個人認為兩位交足戲不過略嫌過火位－－我就死都唔信你地唔知導遊玩法如此，係，叫佢地唔好迫人購物，不過佢地唔迫，份糧邊度有？都是其中一人來得坦白：「就算係零團費都唔應該鬧人唔買野。」係囉，我都知唔應該，係咪你出糧俾個導遊先？

至於旅遊業議會，講左咁耐要杜絕此等旅行團，但實質有冇乜野有阻嚇作用的措施？唔覺，因為全行都知有此等旅行團，邊個敢將之連根拔？好多人搵少好多，到時都唔知搵邊個算賬。

說到尾，當有人不貪小便宜參加這類旅行團，問題就解決了。