我是比較討厭的：半夜三更寫食，準備好接招未？這次到台北三天其實不算吃得特別多，不過幾滿意，有專誠找到的，有意外驚喜的，而主調只有一個字：牛。
好，廢話少講，先由這餐幾令人失望的飛機餐開始：
從來無預計國泰既早餐咁核突，係，核突！果個包係就係熱辣辣，中間夾左唔知係芝士定係吞拿魚醬，唔難食，但真係好核突。雖然我要讚，國泰經濟位舒服左，面前椅背竟然仲有電掣俾你叉電。唔差在講埋，回程港龍果餐，難食到相都費事影。
好，正式台北第一餐，跟朋友食飯，遷就其工作位置，新光三越十二樓，勝博殿，選了夏季限定的明太子紫蘇卷餐：
每檯均有前菜牛蒡及黑豆，高麗菜當然任食，而呢個餐呢，我幾喜歡呢個用紫蘇葉包住明太子炸物，真係咸香之餘又帶紫蘇葉清新（其實我係香港食壽司／魚生飯食埋塊紫蘇葉，總會有人以為我連塊伴碟都唔放過，嗯，你唔識，我唔怪你），其餘吉列豬柳等等都不錯，不過好似香港都有呢間呀可下話？台幣三百九十蚊，抵食過香港喇卦！
中場介紹：是次旅行喪飲的：
呢隻柚子茶梳打真係好飲，茶味濃，廿八蚊台幣，七仔買的。
好，第一晚要等到睇完憶蓮十一點仲堅持由華山行左廿分鐘去食既，就係兩年前去到先知星期日唔開既林東芳牛肉麵喇！
無呃你，呢個鐘數去到，一樣要排隊！好彩排左五分鐘就有位。無野既，點呢個叫半筋半肉麵仲要叫大碗，一上檯，其實唔係好大碗：
呷一啖湯，不得了！係清甜唔濃濁！而且淡淡有牛肉香味，好可喜！蔥花配合之下更加好飲，你再加店內鎮店辣醬就更不得了！牛筋鬆化得來有咬勁，最得人驚係牛展，丁點都不韌，邢且同樣鬆化。兩樣味道調得剛剛好，麵身又彈牙，呢碗，由頭食到尾湯都飲盡，二百幾蚊台幣，食完，就好掛住，下次一定再食！
第二朝一早有在地朋友話帶我去飲正宗豆漿，搭捷運到永安市場，由他帶路到一間叫永新豆漿既舖頭。朋友話，呢間正過四圍都有既永和豆漿好多，又即管試下！
掂！豆香仍在，肯定唔係沖粉既！有機會其實我想試埋米漿，因為見隔離伯伯飲緊，好似好正。
呢個叫燒餅沙律，烤得好香好脆既燒餅，入面夾住好多蔬菜，薄脆，配上特製沙律醬，非常健度，味道又清新，讚！
蛋包蘿蔔絲煎餅，好掂呀呢個！完全唔駛點任何調味料你經係咁食，當地朋友鍾意點甜豉酒。
咪睇少呢個菜包，包本身已經鬆化無窮，蔬菜可口，又是一吃愛上的！最後可惜無試到栥飯，點解呢？因為我望望下諗起，呢間舖，前排Now果位少年食塵，帶左陳柏宇黎介紹過播！仲話栥飯好好食添！
食過早餐，朋友帶左我去附近一間Coffee Shop Hae：
淨係放檯頭呢樽水已經正：玫瑰花香橙片青檸片，好清新啊！
第二杯係我既，叫火焰咖啡：一上檯，小匙上的糖被烈酒浸住並點著火，睇住佢燒溶然後加入咖啡，香濃之餘帶酒意，好得，仲未讚杯碟都好靚！
此店除咖啡外，我見Brunch都好掂，而且仲有樣好，俾你帶埋狗狗入店都得，絕對Friendly！
下回再講。
沒有留言:
發佈留言