使被蹂躝者重生：越色

錯都在我：久不久在面書貼出食越南生牛河，仲要係太古大食代至得果間火車頭，於是令某某島主按奈不住，亂入（食肆）於是慘遭蹂躝；以為佢第二日去邊，點知係明珠，唔差，不過水準真係跌左好多。於是有一日我話佢知：想食生牛河，點解唔問我？

結果，星期六兩點半，帶呢位受害人去食登龍街越色。我知呢位已經康復既受害人已經寫左，不過喇播，我原來咁多集都好似未介紹呢間，介紹過的話我咁耐無食又想提下，又點可以唔寫一寫呢？

話說得知呢間舖頭都係某讀者介紹，咁，當年在灣仔番工，久不久都落去食，雖然，該店門口派飛的肥女侍實在很寸，但佢又未致於寸到我會永不光顧（例如九記）。

星期六到達，兩點半，店仍爆，好彩有位。我以為因為下午茶套餐仍然存在，點知無，都咁爆？因為咁爆，所以兩個人真係坐得一張檯，叫多幾樣野食都擺到好勉強。

好，慢慢介紹：

呢杯係我既，叫綠桃園，有乜睇圖有答案。我覺得好飲，而受害人叫果杯乜乜香蕉聽聞好唔得。

火車頭生牛河，千祈唔好多口叫加大，會飽到上心口。要求牛肉另上，此店非常好，唔會多多野講又話要加錢，我明白有舖頭繁忙時間唔會另上，但要加錢我就不能接受。

此火車頭有齊牛丸牛柏葉牛腩牛筋，講牛腩靚就應該大食代勝出，不過此店湯底味精偏少，而且清甜，其他料亦水準不錯，加上另外附上生芽菜金不換與及青檸，基本上唔落醋，都好好味！

生牛肉好得！唔會雪到硬晒，一放落湯淥一淥，軟滑鬆化牛味濃，簡直無得彈！呢個火車頭，相比我早前食晏是但走入灣仔肥牛河果腕不知所謂，高好多好多層次。

蒸粉卷，真係皮薄餡靚，當中豬肉碎木耳絲之類調味剛剛好，加上許醋，一啖食晒，得左！

呢個辣炸軟殼蟹第一次叫，Bingo！首先炸得好唔在講，脆漿夠薄，蟹仍然鮮味，其次以避風塘炒蟹方式再炒，難得唔會喪落味精，加上油泡珍珠葉，果真出色！

能夠令到一位受害者對生牛河重拾信心我當然功德無量，我終於能夠再食到呢間生牛河亦十分感人。觀乎食足一粒鐘出面仲有人等緊，無野架，好唔好食，有時真係睇你識唔識揀架咋。