駛錢都要醒目點

最近網上傳得最勁的其中一個話題，除了我都極之喜歡的高登神獸咭之外（話時話，真係出我一定買番套），肯定是小南國的單據收貴一大截事件。

由於若果事情屬實的確幾過份，本港傳媒無理由不查，結果證實真有其事，小南國的解釋表示因為有些食物的份量不是例牌所以收貴了。老老實實，夾硬而牽強。

此等事件並非首次發生，不過總是久不久見一次報大家又會記起埋單前要對單。我呢，通常一班人吃飯時，都會計一計數，差不多才埋單。我時常覺得，就算你幾有米都好，無謂益奸商嘛！

首先講的是用膳：通常最容易被黑店出古惑收貴的，是一大班人吃飯的情況，因為吃得興高采烈，埋單都是是但但簽咭走人，甚至有些情況大家都飲到啤啤呼，不清醒就更易被騙。

要避免被騙，在點菜時我跟朋友們都有個共識：就是盡量都點例牌，不夠吃寧願同一道菜打孖上。為何呢？餐牌價錢都是例牌，侍應提議因為人多將之加大，不是不可，若果是食慣食熟的老實店舖，例如蓮香，我們絕對不介意，反正最後埋單我們只會覺得『乜食左咁多都係咁平』；不過，若果不是相熟店舖，你難道每個菜問侍應：『加大點計先？』很麻煩吧！

中學大學年代在茶樓食飯點小菜，往往發現那些將份量由例牌加到中或者大的小菜，價錢貴很多，份量卻不是成比例的增多。既然如此，貨真價實，以免麻煩。

引申下去，我們通常都點餐牌有的菜式。對於沒有的，點了，記緊問清楚價錢多少，埋單時對單。

一大班人聚餐最容易俾人呃的，應該是汽水的數目。坦白講，若果不過份有時都未必核對得那麼清楚，只不過養成埋單時Check單的習慣，永遠著數的只有自己。

例如去茶樓飲茶，我都不止一次發現有茶樓埋單時出現我沒有吃過的點心，精靈如我當然發現然後要求對單啦！所以，就算你地幾唔志在都好，埋單時點都核對一下，慳埋慳埋可能係好多。

同樣道理，對於電訊商的月結單，或者信用咭過數的，都請慣了對單。有某一兩間電訊商是出了名單據容易有錯，用戶就更加要對單，發現唔知條數點計，立刻致電要求他們講講條數點計，問多兩問，你會發現，他們原來計錯了，或者有些說免費的又收你錢等等。

總之，別懶惰，要駛錢，都要做個精明消費者。