2011年1月14日星期五

食在太古(8)之名家

此系列應該仲有一兩篇貨仔,咁,食過,覺得想話過大家知既,都應該寫寫既。

無錯,今次介紹係去年十二月於太古城開張既名家。咁佢銅鑼灣世貿店我一直讚不絕口,而呢間前身韓國菜館哈魯邦我極之唔喜歡,知道名家進場,都有熱切期待。



試過午市套餐,水準保持,於是有次去食晚餐,因為十二月二十日前食有八五折。不如睇睇午市先: 
前菜一樣有咁多碟。
我呢個牛骨湯套餐,好鮮味,可以既。

同事呢個燒牛肋骨,同老銅總店質素相約。

晚市呢?首先,店內只有三名由老銅調過來的侍應加經理,其他均為新人,最慘係有帶鄉音既女士--首先唔係歧視,而係老銅係好高格調,呢間當堂Downgraded。不過若果佢服務一樣專業,大家絕對無問題。結果?唔知係咪唔夠人,等人帶去坐都等一排,門口有兩三班Walk-in客已經極不耐煩,死火啦。

與朋友坐定定,發現此店嘈到飛起--呢個除左與旁邊一隊有一個極品港孩喪喊喪叫有關之外,桌子之間距離太近亦係主因。

打開餐牌,發現好多老銅有既呢度都無,心已經涼了一截--唔通今次中招?

燒烤食材係保持水準既,不過服務態度就差一截:人成日搵唔見都唔在講,想好似老銅咁,會立即自動自覺同黎換走塊烤板?你叫佢佢會覺得你麻煩。一坐低爐底有上手積落既湯係坑邊,叫佢抹,佢會話:都無乜所謂啦。要你再兇佢先至幫你抹。
食完燒烤想食個麵,在我地未知叫錯之前,有位鄉音阿姐走過黎笑笑口:「夠唔夠食呀?仲駛唔駛叫d野燒呀?」那一刻,感覺以為自己去左老旺壯陽院。
跟住呢個麵,睇相先:
無錯,係要侍應為我地煮既。結果呢個煮既過程十幾分鐘(!!!),而仲要分左幾個人,得閒走過你唔叫佢佢唔理你,攪兩攪又落多少少,製成品,唉,淡到飛起,都唔知典解我地會叫呢個麵,超錯!
埋單前有個雪糕送,雲厘那味,全晚最好食。

當發現價錢無折其實與老銅差唔多,論食物選擇與服務質素,唔駛諗,一定係老銅。呢間,Blacklisted。

沒有留言:

發佈留言