點知原來最近有位曾經於一蘭主理既廚師黎左香港，十一月係中環老蘭附近（明珠越南菜館果條街）開舖，舖仔細細得十幾個位，每日限賣二百碗麵為左保持質素，聽講日日排長龍仲有人望門輕嘆。我等閒人又點可以唔去食下呢？
根據今期飲食男女列此店豚王為兩星級食店，並表示今日用三十五斤豬骨熬二十個鐘做湯，麵條每日新鮮製造。今朝，就算尋晚半夜支持曼聯極度眼訓，都要十點起身，結果因有突發事，十一點二十三分到達，前面，已經有三十幾人排隊：
有學生有老外有上班一族，都要企係垃圾側邊等，個個無投訴。無耐就有店員派落單問卷，與一蘭一樣，都係樣樣有得揀，唯一可惜係佢話我地知，因為禽流感，所以無蛋，嗚嗚。
我就揀左呢個，最原味既豚王，筆都係佢地俾，一個傳一個，好乖呀大家。
12:43PM，我坐低喇！檯面有一樽水，有芝麻，有辣芽菜，有蒜醋，有生蒜俾你整蒜蓉，仲有七味粉及胡椒粉。
舖頭只有十三個位，但有兩名師傅入面煮麵，一名清潔阿姐，仲有兩名哥哥仔好禮貌招呼客人確定每個人叫乜然後俾師傅煮麵，除清潔阿姐外幾個人都用日文交談，仲久唔久大叫果隻（唔係叫二三四），你真係以為自己去左日本架！
12:52PM，我碗麵到喇！首先欣賞佢叫多蔥多木耳分開上，真係好多！一試個湯，啊！一蘭的感覺回來了！雖然湯比一蘭肥膩，但真係好有果回事既感覺！麵都係同一蘭有得比，蛋味差少少啦！叉燒唔夠香，不過好過好多香港舖頭喇！不如重溫一蘭既又係點既：
一路食，我諗呀，又唔駛機票，呢碗麵都係八十五，依家日元咁貴，乜都值啦！再不斷聽到左右食客嘩嘩聲大叫好食，又話黑王好正，下次要叫，更有人每人一碗之後即時追加（我就食唔落啦），咁，你地覺得係咪我吹大左呢？
食晒！湯都飲晒！完全唔會有口喝感覺，大滿足！
1:15PM，開心離開，嗯，不如趁未番工，再黎囉！
ＰＳ：又係因為呢期飲食男女，我忍唔住又要飛台北喇！今次目的係花博之外仲要食得好，所以，我今晚有心機會寫幾篇好野呢幾日滿足你地既『食慾』－－就係本人呢排放假四圍去食過乜喇。
沒有留言:
發佈留言