妹仔大過主人婆的勁歌總選

真係真係真係，成晚笑到我停唔到口既一個頒獎禮，無線好成功，贏埋新城喇！不如先講講，無記今年情況仲惡劣過上年，因為又多左間唱片公司唔玩，再加上幾個歌手唔簽，例如，農夫，咁今年真係難為了無線！

老玩法，都係以Point Form講講有幾好笑：

－全晚最最最好睇當然係關淑怡啦，不過阿姐佢都係唱兩首歌野都唔講走人，但你地留意，兩首歌播！全晚唱得最多最完整係佢架喇！

－有冇留意今年無逐個歌手出場介紹？點解？唔駛講喇卦！費事笑死人啦！

－好核突既一件事：台中央果幾部LCD，上半部節目最正中有兩部壞既，主持又好歌手又好，一企埋去就見到，醜死鬼。

－唔知係咪俾唔夠錢，玉女黎到只係同古Sir吹水唔唱歌，你話幾失望呢！

－呂方果部份無問題，倫永亮果部份，我想講，諒解無線無野做三十周年再次擺梅姐上台，但咁樣Tag倫永亮出黎，佢個Look嚇死你，唱仲嚇死你，係尊重定係點呢？

－今年十大金曲分得勻左喇：英皇四首，東亞四首，金牌一首，星娛樂一首。分得勻唔代表分得明智：鄭融果隻我跌左落地，許志安果隻完全唔識唱，阿Sa姐果隻都係，所以，關心妍呀，GEM呀，Rubberband應該好嘔血，分埋ｄ豬肉都無一隻歌。

－更加要話一話無線：既然請到A-Lin黎陪你地癲，好心就造隻國語金曲金獎俾佢啦，歌都唔駛唱，徙晒！

－今年最超值交易大獎：黎明走音情深說話未曾講換得JW新人金獎、男人信什麼金曲獎，仲要囉埋金曲金獎，抵呀！

－有一樣野更要佩服黎明唱片公司既美指：JW幾甜幾靚女呀，點解唱片封套可以老十年變七月十四女鬼既？

－其他獎呢，我第一個爆笑係傑出表現獎銅獎，超級巨聲群星，真係服左無線史無前例，比起許廷鏗囉果個伸淫戰場標童獎更爆。

－其實好多獎今年都係無線勤工獎，比以前更甚：張繼聰啦，陳偉霆啦，陳奐仁啦，王梓軒啦，Benji & Lesley啦，當然唔少得超級巨聲群星啦！

－更奇怪係：新人獎唔駛唱，最受歡迎唱作人唔駛唱，改編歌唔駛唱，傑出表現唔駛唱，但廣告歌又要唱，國語歌又要唱，合唱歌又要唱，點解俾容小姐唱咁多次架！

－勁正另一位：陳奐仁加mc jin囉最受歡迎唱作人，有創意，吹你唔漲，好野！

－合唱歌真係另一爆位：首先，我一直以為初見係千嬅獨唱歌（好彩千嬅隻碟係獨唱嗟），千嬅囉獎真係第一正：我十五年未囉過，但最正都係呢句：『多謝峰哥，冇峰哥都攞唔到呢個獎』我諗真係台下幾多人忍笑忍得好辛苦呀！

－但係最正都係峰哥唱呢首合唱歌，鬼食泥，好似完全無her過咁，失禮呀！

－又係峰哥：囉亞太區，真係，佢真係，好Chok，我幾個朋友一齊係MSN異口同聲都話佢好勁，連個鼻哥窿都Chok！我比較衰，聽到佢多謝屋企人，望一望側邊既祖藍，我諗起佢個妹。

－全晚最佳表現獎一定係楊千嬅！囉亞太區果陣，真情流露話好開心，『絕對唔係虛偽』，因為未囉過，點知臨尾爆個勁gag：「多謝我老公，令我成為丁太，可以囉阿太區最受歡迎女歌手」呵呵呵，寸埋阿峰哥播，丁太！

－最受歡迎男女歌手都幾反高潮，反高潮在係由福祿壽頒獎，亞太區反而有頒獎嘉賓，真係呢，好重視呢個獎囉！

－今晚最多人多謝既你知唔知係邊個？雷頌德？林夕？黃偉文？錯錯錯！係鄧志偉！無線所有主題曲電影歌既Internal Composer！

－所以，下年仲未傾掂數的話，都唔知無線可以點攪落去，好可能我地會見到法拉囉金曲，黎耀祥應該都有獎囉！

好開心，多謝TVB，我係真心既！