上海吃什麼：西貝莜面村

今次北上無乜時間搵餐廳，好彩朋友同事對我好！於是有一晚，我有得食西北菜。

西貝莜面村係蒙古連鎖店，老闆姓賈，所以店名西貝。呢一餐，平靚正又好食，下次一條友都可以去食！

是咪睇餐牌都覺得好多想試？首先介紹呢個，蒙古牛大骨，我地揀牛肋排骨！

好濃牛味，調味剛剛好，肥瘦適中，連湯汁都好味，呢一碟百三人仔，超好食！

西貝麵筋，係粗身寬麵條，加上芝麻花生粉青瓜紫耶菜豆干，配上冷麵醋汁，清爽開胃完全無負擔！

 

朋友係蒙古人，所以佢介紹我點呢個蒙古燒賣。啖啖肉，仲要係羊肉，我就非常喜歡，而且都幾鬼飽！

呢道又係冷菜，叫熗拌枸杞芽。枸杞苗加上豆干再用上微酸汁拌和而成，開胃又爽口。

 

左邊係烤羊肉串，非常抵玩，六蚊人仔一串，好好味；右邊係烤羊腰，就貴好多喇，廿六蚊人仔。朋友見我點都問：好羶架播，怕你唔鍾意食。結果？我咪一樣食晒！

 

 最後介紹：左邊呢支叫沙棘汁，沙棘英文叫Seaberry，我就本住乜都試下，好飲，淡甜而且有夥粒；旁邊呢個羊奶凍呢，係所有菜不能夠係特定時間到齊，餐廳自動送既。

此店聽講分店唔少，若果你好似我咁好愛西北菜，此店的確係平靚正既選擇。