北上吃的事情：蟹榭

一年一度北上出差，地點同樣是上海與北京。工作非常繁忙，防火牆繼續強橫（不過今年唔知點解酒店又俾上VPN喇播）。是次天氣算不錯，而最重要的部份，究竟吃得好不好呢？

經過上年的教訓，小弟今次帶備不少人仔（因為我係果隻無支付寶之類既人），果然，又遇上大大間餐廳唔收外國信用卡（上海比北京嚴重）。今次介紹呢間，同事帶我黎既，好食，但係又唔收外來信用卡。

蟹榭乃上海連鎖店，食蟹既。整體菜式出色，價錢合理，雖則都有近年將菜式擺盤誇張情況，但的確好食，而且裝修簡單，若果去開上海，的確可以試試。

先介紹幾款冷菜前菜：雙椒嫩雞凍，其實係將雞湯雞肉整成凍糕狀再配上辣椒醬汁：

好食，開胃之餘仲好涼快，我去果陣上海都仲未凍。

酸辣肚尖，我就至愛喇，送飯齋食都一流，辣度好合我心意。

酒汁蟹鉗，呢個至驚喜！雖然真係煩既，食每一隻小蟹鉗都要咬殼同啜汁同肉，但酒香與蟹肉非常配合，試過你就唔會嫌煩。

呢個又係好食！鮮花椒熗蚌片，有椒麻感覺又新鮮爽脆，極得呀！

 

我就出左名好怕食一類要我係飯檯上面整到污糟晒既食物，所以要拆蟹呢我就可免則免。因此，呢個純蟹粉小籠包就岩晒我喇，你睇，真係好足料，逐粒點，好滿足。

我都有飲湯既，呢款係松茸老雞炖遼參，幾十蚊一盅，飲一啖湯就知鮮甜。

 

呢個叫蟹粉桃膠，同事指定要食。桃膠，就係黃山野山桃樹膠汁製成，再與鮮拆蟹肉蟹粉炆煮。桃膠本身高纖高植物蛋白質，本身無乜味既，所以呢種煮法就好喇，依家食到蟹肉鮮甜。

另一必點菜式：黑魚籽蟹粉花雕龍蝦湯蒸蛋。個名好勁，龍蝦湯味唔濃，但重點係，蛋蒸得好滑，淡高湯配上滑蛋加蟹粉又點會唔好食，至於黑魚籽，可以既，無左亦唔會令整個菜式減分。

的確，此店係好岩我呢類要食蟹粉又懶又唔想淨係食蟹粉既人，叫當地人幫你訂位囉，因為都幾旺場。