喂又係我，第三日的確早左少少出發，乘坐日比谷線到達築地，步行約五分鐘到達築地市場。無錯，尋日無開，今日當然要先入場內。
對於部份無乜概念既遊客（特別係洋人啦）只會望見邊間吸引就去排，越近市場出口就越多人排。所以，節目有介紹過既專賣貝類壽司既岩佐壽、與及旁邊做無菜單壽司料理既竜壽司我於九點到達都開始有人龍，反而賣蟹肉意大利麵既Tominaトミーナ就無乜人排隊。
不過今日第一餐目標明確，我走到去壽司大果條巷，人龍多到嚇死你，而且唔係一間而係幾間都咁排法，壽司大，食炸蝦既八千代，獨有六法茶漬海鮮丼既SHOU鮨晶（雖然我肯定門外都只係食Omakase）都打晒蛇餅，而我一心想去食，係小田保既吉列蠔定食：
到達時前面有八個人結果都等左半粒鐘（原因請詳見《
餐廳文化》一文），坐定定喇，餐廳就係咁細間：
點了吉列蠔定食（1,650日元），是要慢慢等慢慢等，等到有得食喇：
有三件吉列蠔亦有三件煎蠔。首先，蠔非常鮮甜，不過我都要非常坦白，老師傅當日炸出黎係有少少過左火，不過炸漿好薄好脆係真既，亦所以煎蠔更好食。他他醬是自家製的，其實食完呢個餐（加埋支Asahi）係好滿足既。
離開，見到壽司大旁的愛養珈琲廳，於是入去嘆番杯齋啡先。
450日元一杯，好喝，而且那份情懷與悠閒感覺也要算進去：當你在嘆啡，睇住外面排晒隊等食壽司既，對比好大。
飲飽食未夠，但需要散散步。我曾經掙扎好想入去隊個蟹肉卡邦尼，但我知道唔可以咁。
再到場外，鮨國同一條小巷另一邊走進，在兩家店買了手信，其中一家築地100都有介紹，價錢約1000日元三至四款，好划算亦好容易係咁買係咁買，重點係你可以試食先買。咁又要買俾屋企人又要買俾同事，呢度一次過攪掂晒。
大受歡迎，同事特別點名稱讚呢個蕃薯條，原甜味已經殺晒。行到咁上下，我下一間目標係壽司店。本來想搵節目介紹既秀德二號店，但行經好似無開門，於是自行找秀德本店。要講解番，秀德本店不好找，在鮨國右手邊有北海番屋，再旁邊有一小巷，我發現有人排隊，又見到秀德的燈籠，我搵到喇！
我前面企左六個人左右，我亦唔知舖頭得幾大，最後等左三十分鐘入座。舖頭得十個位，全都係食壽司套餐，由2,900到8,000共四款，我選第二貴既6,000日元。師傅炮製既係赤醋壽司（即用日本紅醋製作壽司飯），所以特別好食。
上圖乃師傅所用之赤醋與岩鹽。咁係呢度又要多謝
Ｐ幫我將食過既翻譯中文名俾我，我先可以話俾大家知我食過乜咋！
第一件叫羽太，是一種斑魚，配上鹽、大葉碑及鮮檸汁；另一件是平目魚，配上醃蘿蔔善，完美的組合。
此帆立貝壽司，帆立貝來自北海道，肥大肉厚又鮮味，配上海鹽及青柑汁，滋味無窮！
赤身，輕抹醬油，魚靚，配上赤醋飯實在不得了；旁邊呢件海膽壽司，呢個層層疊既狀況，都唔駛點話你地知有幾好食啦！
赤貝，師傅通常都會將塊赤具割一割然後大大力撻落壽司檯（我第二次見相同處理手法），爽甜脆口；旁邊的鰤魚，咁肥美油光咁靚，實好食架。
你知唔知我睇住師傅用火槍炙白子到真係放係我面前有幾心急呀？你知唔知放入口果種Creamy感覺有幾美好嘛？
又點能夠無拖羅呢？跟赤身的確有分別，油份較多，這是中拖羅。另外是穴子，好味！
最後是手卷啦，你問：六千日元值唔值呢？我覺得值，因為是好高質食材，仲要係赤醋壽司，與及如此隱密的小店，去旅行唔係唔好有錢亂駛，但駛得值係好重要既一份體驗。
好喇，既然你仲睇到呢度，築地100我真係有做左少少功課執左個
地圖既（唔係所有舖頭啦，我鍾意果ｄ啦），係下年三月築地市場搬出之前，有需要咪囉我個地圖去參考一下囉。
沒有留言:
發佈留言