2012年10月10日星期三

灣仔上樓正泰菜:嚐泰

或者因為見不少朋友又飛泰國旅行在面書曬命,我其實都好掛住曼谷,因此,早前連續一星期食左三餐泰國菜,而今次要介紹呢間,其實係同事先帶我去食晏,發覺好得,最近去食晚餐,確定掂先介紹大家。

店名叫嚐泰,位於灣仔石水渠街,樓上舖,地址自己搵啦,因為我肯定你地會覺得我無介紹錯。




一入門口就見象神,舖頭電視長播泰國電視台,店內所有侍應廚師都係泰國人,而且都係後生(根據食客意見調查,侍應都幾好樣架,靚仔靚女啦--如果你覺得係賣點)。店舖裝修簡單,不過店員服務好好,而請請請記住,食晏唔訂位,唔駛旨意有得食:

午市點冬蔭功一樣好多蝦,仲要係有膏果隻,好鮮甜,料又足,唔會一味酸或辣,仲有椰香。

午市套餐兩個選擇,都係五十蚊左右連飲品與小甜品,質素好好!

小蕃薯糖水呢!

不如去片講晚市:話說睇Yoyo之前六點幾去到當然無乜人,但一邊食舖頭已經不斷有人黎,仲要有人訂位。咁,我同朋友食左乜呢?

此生菜包本人極度歡喜,都幾辣,但好惹味,你係停唔到手停唔到口架播!

青咖喱雞,用上原裝泰菜常有既青豆,泰國精朋友話好正宗,而且個咖喱汁好得,飯都食多幾碗。

呢半隻泰式海南雞係必點!首先,乜醬都唔駛點,呢個雞係又滑又嫩,就算你怕肥,呢個雞皮不能不食,總知,真係坊間屬高水準,而且唔貴播!

朋友已經bookmarked此店,表示會多多幫襯,好多樣食物都想試咁話,我就好贊成喇!

沒有留言:

發佈留言