又是續約的時候

那些收費電視手提電話寬頻差不多到續約時你不用記得也會有人提你，不過由於我近年用了iPhone那個Caller的App，所有類似電話殺無赦，所以，他們要在續約前好幾個月致電我手提找到我是很困難的。

不過他們總有辦法的，近日，亦終於為那兩個收費電視續了約，且看情況怎樣。

有線五月底找我，好像是八月左右約滿。其實一直覺得有線唔多抵又唔多野睇，但一日有英超一日都不能放棄之。現時收HK$309一個月真係唔多順氣，有睇波既朋友都明白：又濛，評述又廢，仲要唔似Now有自選Replay。

咁，打到黎，原價，加多三十送晒所有高清台換埋個解碼器，另外講到明，若果無左英超又唔知每個月減幾十咁。咁，其實佢畫面靚番，我都有好多可以睇，特別係新聞啦，依家多左Cine P又有多戲睇，問過其他用家意見之後，拍板，會係七月中黎換，到時就可以高清奧運，Thank You。

至於Now，係幾好笑：八月頭約滿，四月中打黎。果位弟弟口窒窒，又話因為乜乜物物要加價，由原本HK$221加到HK$260先至所有台繼續有得睇。由於俾佢煩左好耐，而又覺得一直睇Now係好多，諗住算啦。

點知佢同我對資料果陣話：咁呢個價錢就會由聽日起生效。。。

『咪先，咁我舊約未滿做乜要提早俾貴幾個月呀？咁我唔續住囉！』

『到時個價錢又唔同架喇播！』

『到時至算囉，可以唔睇架！』

佢無奈地收線，不消兩分鐘又打黎：『經理話額外送多HK$200惠康禮券俾你。』

『你地一時一樣，都唔明你做乜咁急要我續，遲下先算啦。』

於是，時光飛逝，早兩日收到Now來信，表示唔續之後收正價，叫我致電客戶熱線云云。

終於，都話左，遲，有著數。依家做緊免六個月，我簽廿四個月，超強體育組合（無曼聯台）及無線收費台全套都免六個月，平均只係hk$192，再加我新歡Movie Movie（百老匯電影中心電影台，好多偏門戲，仲有戲院同步播，而且自選可以睇番大部份戲，勁抵，HK$34一個月送多兩張百老匯電影中心戲飛俾我），依家平均每個月HK$222，多高興！

好，到手電。與１２３的約八月會滿，佢地當然已經撩我續約啦！其實觀乎市面各電訊供應商質素，Smartone全城話佢差到飛起，其餘唔會考慮，1010太貴，咁多數都會與１２３續約。由於已經有部4S，嫌煩的我應該繼續信奉蘋果，於是，續約重點係：我可唔可以中途出iPhone5呢？

今日問門市答我唔到，既然時間尚有，慢慢來吧！