抵食高質西餐：Le Mieux Bistro

朋友約食晏，她表示該餐廳要兩星期前訂位，名叫Le Mieux Bistro，是名廚Ricky Cheung主理的（Now的煮角其中一名鐵膽主廚，另外飲食男女應該仲有專欄）。

餐廳位置在灣仔道與菲林明道交界，同幢大廈都是食肆，所以不難找的。午時套餐有兩款，Set Lunch一百六十五元，Deluxe Lunch二百多元。我們選了Set Lunch，豐富到不得了。

麵包好好食，熱辣辣多花款，而且牛油及芝士醬極正，兩個人食這盤麵包，很滿足的！

這吞拿魚沙律一定要讚：份量多，蔬菜生果新鮮爽口，欖油與醋調味得宜，吞拿魚又好食，真係無得彈架！

蘑菇湯又係極得！你地見啦，幾稠，而且好好味，仲要入面好多菇，真係啖啖都咁好！

主菜同樣份量十足，而且唔駛你揀，牛加魚。魚好鮮嫩，煎得香口；牛柳半生熟又無渣，配菜由薯蓉到蔬菜都保持水準，食到呢一道菜，真係好滿足！

即唔係話我乜都讚，但呢個咖啡香濃無比，又要加分喇！以為無？錯！仲有甜品！

甜品絕不欺場！右下角果仁雪糕，底墊有鮮果粒，左上角就不得了喇！阿華田慕絲，真係好掂架！

你地話喇，呢個餐，咁高水準，都只係HK$165加一，係咪明白點解要咁早訂位呢！