旺角帝京酒店二樓花月亭，很久之前食過一次自助餐，因為很久，印象不錯，但很模糊。是夜朋友請客，本來他打算到朗廷酒店，但後來他又表示好像食評不佳，於是我找到這間，知道最近是西班牙意大利主題，又肯定有生蠔，拍辦了！
首先晚市捕飛原價四百幾，不過分兩個時段又平好多，但極奇怪：六點至八點三四八元正，八點三至十一點三二八元正，我並不清楚開飯有冇優惠用唔用得，之不過聽完我介紹，三二八元正，超超超超值！
不如等我試試憑記憶一口氣講講有乜野食：
冷盤：瀨尿蝦，大蝦，雪場蟹腳，翡翠螺，青口，意大利生牛肉片，意式茄子，水牛芝士蕃茄，幾項蔬菜，好多款沙律菜，風乾牛肉，巴馬火腿，沙樂美腸，巴咸火腿，即開生蠔，數款即製壽司，三文魚吞拿魚八爪魚油甘魚刺身，冷麵，溫泉蛋，煙三文魚。
熱葷：燒牛肉，燒羊架，焗龍蝦，鴨肝多士，焗薯，燴牛肋骨，炒雜菌，忌廉燴海鮮，烤雞，西班牙燒豬，意大利燴飯，幾款咖喱，辣酒煮花螺，乜乜燴菜膽，臘味糯米飯，豬腳薑，即煮意大利粉。
湯：南瓜忌廉湯，一項中湯，意大利海鮮濃湯，鴨粥。
飲品（任飲）：咖啡茶檸茶汽水薏米水
甜品：小葡撻，72%特濃朱古力心太軟，北海道牛乳燕窩布甸，麵包布甸，法式燉蛋，窩夫，薄餅，雪糕，豆腐花，糖水，好多款蛋糕，木糠布甸，香檳荔枝草莓jelly，斑蘭葉椰汁糕，馬豆糕。。。。。
點？我講講我食過乜喇播：
燒牛肉係全晚唯一差少少，因為唔夠鬆化；羊架好好食，咁右下角既風乾火腿又係乜呢？
絕不能錯過意大利海鮮濃湯！有魚肉有小龍蝦有蜆有魷魚，仲有塊法包，呢個湯，酒店飲閒閒地過百以上，呢度，任飲。
無估過飲品任飲，通常只係Coffee & Tea，點知有薏米水，清清地，幾好。
你地話係咪？呢個價錢咁多好野食又要好食，仲想點？唔知呢個主題做到幾時，想試就快喇喂！
沒有留言:
發佈留言