至新至潮

身邊有沒有一些朋友喜歡追潮流，買電器用品等等都要跟得好貼呢？又或者永遠相信工欲善其事必先利其器，對於一樣興趣著迷初期就落重本買器材呢？

我當然遇過或者認識這類朋友啦，朋友者，若果佢買得起花得起，我都不會發表任何意見，反正錢不是我的；幸好未遇過類似的情人，否則肯定鬧交多過食飯。

我總相信每個人總有可以令其駛錢的死穴，我本人呢，就肯定是買唱片或者聽演唱會，不過近幾年聽演唱會少了，原因是花幾舊水始終肉痛，要睇我就會睇最好，否則不如唔好睇。所以，其他人相信同樣有些死穴令其傾家蕩產。

女士買衫買化粧品護膚品比較容易駛錢，相反男士就係高科技產品或者，車。不過我無乜認識富貴朋友以換車為嗜好，不談此項。

有些朋友追求至新至潮比較精打細算，因為他們懂得有買有賣，不會覺得用過唔捨得放手。於是，他們追求新的代價較為便宜，亦為之較醒目。

有些朋友享受『買』果一刻的快感，因為他們都較貪新忘舊，追逐的潮物又有幾條Lines，所以新玩具多到玩唔晒，但，因為要至潮至新，所以，要買。

有部份朋友，其實唔係追求潮物，不過對於一眾高科技東東又有少少興趣，一遇上被人推介，很容易以為快人一步買回家。

身邊有一大例子：我家父。

家父久不久就會購買一些佢以為好新但其實又未至於俾人搵笨既高科技產品回家，每每都令我與細佬頭痕。曾經試過買一部我當時唔識係乜牌子既數碼相機回家，佢當時解釋話：「邊個邊個朋友話好，咪買黎試下囉。」結果，果部相機的確極難操控，個人基本意見係：非常之唔User Friendly。

另一次，又係唔知邊個朋友咁好介紹，用比平常價錢高三成買左一個數碼相架番黎。不過咁，放左佢至愛孫女既相入去，幾貴都值。

仲有一次：大廈物業管理公司推介機頂盒，又係問都無問買番黎，結果我果次幾不孝，黑佢面－－因為我覺得咁新既野，睇定先買。至今，我細佬相信係最唔鍾意呢部機頂盒既人：時常認唔到Harddisk錄影，極唔掂。

佢另外又喜歡見信用咭推介潮物而去購買，不過近幾年已經會問問我地意見，所以，此情況已經無乜出現。同樣地，近年老爸有興趣買任何潮物，都會問問我與細佬，又或者，索性等我地買。

其實寫出黎只係想講一件事：男人，係好容易俾人說服買一ｄ唔等駛又或者以為好岩用既物品。

另一件事就係：老豆買乜野，都係俾我地用，所以，佢係好爸爸。